“Hizbullah” terror təşkilatının baş katibi Naim Qasım İsraillə genişmiqyaslı müharibəyə daxil olmağın ciddi hazırlıq tələb etdiyini və həmin hazırlıqların həyata keçirilmədiyini bildirib.

Qasım bu fikirləri yerli televiziyaya verdiyi müsahibədə səsləndirib. O deyib: “Əgər “Hizbullah” İsraillə tammiqyaslı savaşa girsəydi, nəticə geniş dağıntılar, ABŞ-ın birbaşa müdaxiləsi və münaqişənin daha da yayılması olardı. Amma bu, əsas hədəflərə çatmağa imkan verməzdi”.

Baş katibin sözlərinə görə, “HƏMAS”ın 7 oktyabr 2023-cü ildə İsrailin cənubuna hücumundan sonra başlayan Qəzza müharibəsinin ilk günlərində “Hizbullah”la heç bir koordinasiya aparılmayıb.

“Biz həmin hücumun olacağından xəbərdar deyildik, buna görə də dərhal münaqişəyə qoşulmağımız mümkün olmadı,” – deyə Qasım əlavə edib.

Naim Qasımın sözlərinə görə, müharibə başladıqdan iki ay sonra “HƏMAS” təmsilçiləri “Hizbullah”a müraciət edərək bildiriblər ki, artıq verilən dəstək kifayət edib və əsas məqsədə çatılıb.

“O andan sonra isə İsrailin hücumları daha da aqressivləşdi, ABŞ isə onlara məhdudiyyətsiz dəstək verdi”, – deyə o vurğulayıb.

Xatırladaq ki, İsrail ordusu 2023-cü ilin sentyabr ayında – “Hizbullah”ın aylarla davam edən raket hücumlarına cavab olaraq – Qəzza zolağında başladığı hərbi əməliyyatları Livana qədər genişləndirmişdi. Bu əməliyyat zamanı “Hizbullah” lideri Həsən Nəsrullah və təşkilatın bir sıra yüksək vəzifəli komandirləri hədəfə alınaraq öldürülmüşdü.

Müsahibədə Qasım qeyd edib ki, regionda təhlükəli eskalasiyanın qarşısını almaq üçün o dövrdə tammiqyaslı savaşa girməmək daha məqsədəuyğun idi.