Suriya ilə İsrail arasındakı danışıqlara yaxın mənbələr bildirirlər ki, iki ölkə arasında təhlükəsizlik anlaşmasının Suriya prezidenti Əhməd əş-Şaraanın BMT Baş Assambleyasında çıxış edəcəyi toplantılar zamanı – 25 sentyabrda açıqlanması və ya imzalanması gözlənilir.

ABŞ prezidenti Donald Tramp administrasiyası bu beynəlxalq tədbirdən Şara ilə İsrailin baş naziri Binjamin Netanyahu arasında görüş təşkil etmək üçün istifadə etmək istəyir. Toplantıya Trampın da qatılacağı qeyd olunur.

Bu Amerika təzyiqi, Suriya prezidentinin İsraillə təhlükəsizlik anlaşması barədə “irəli səviyyədə danışıqların” aparıldığını və anlaşmaya Qolan təpələri sərhədində hərbisizləşdirilmiş zonaların da daxil olduğu bir sıra tənzimləmələrin salınacağını açıqlamasından sonra gəldi.

İsrail mediasının verdiyi xəbərə görə, Netanyahu dünən druz icmasının ruhani lideri şeyx Müvəffəq Tarif və digər dini-sivil şəxslərlə görüşüb. Netanyahu Suriyadakı druzlərə dəstəyini təkrar ifadə edərək Əhməd əş-Şaraa hökuməti ilə əldə olunacaq razılaşmaların onların əleyhinə olmayacağına dair təminat verib.