Türkiyədə Cümhuriyyət Xalq Partiyasını (CHP) sabiq sədri Kamal Kılıcdaroğlu haqqında açılmış cinayət işi üzrə məhkəmə qərarı elan olunub. O, “prezidenti təhqir etmə” ittihamı ilə 11 ay 20 gün müddətinə həbs cəzasına məhkum edilib.

VAXT.AZ Türkiyə mediasına istinadən xəbər verir ki, qərar Mersin 3-cü Ədliyyə Cəza Məhkəməsi tərəfindən çıxarılıb. Məhkəmədə baxılan iş çərçivəsində sabiq siyasətçi Türkiyə Prezidenti Rəcəb Tayyib Ərdoğan barəsində səsləndirdiyi ifadələrə görə mühakimə olunub.

Məhkəmə araşdırmasının yekununda hakim heyəti Kılıcdaroğlunun təqsirli bilinməsi barədə qərar qəbul edib və ona 11 ay 20 gün müddətinə azadlıqdan məhrumetmə cəzası təyin edib.

İş materiallarına əsasən, Kamal Kılıcdaroğlu daha əvvəl bu iş üzrə Ankarada ifadə vermişdi. O, müdafiəsi zamanı səsləndirdiyi fikirlərdən peşman olmadığını bildirib.

Sabiq CHP lideri ifadəsində həyatını vicdanla yaşadığını, fəaliyyətində hər zaman dövlət və xalq maraqlarını əsas tutduğunu vurğulayıb. O, çıxışında kasıb insanların hüquqlarını qoruduğunu və dövlətə sadiq qaldığını qeyd edib.

Verilmiş qərarın hələ yekun olmadığı bildirilir. Müdafiə tərəfinin qərardan apellyasiya instansiyasına şikayət verəcəyi gözlənilir. Bu halda iş daha yuxarı məhkəmə instansiyasında yenidən araşdırılacaq.

Hüquq prosedurlarına uyğun olaraq, qərarın qüvvəyə minməsi üçün apellyasiya mərhələsinin tamamlanması tələb olunur. Bu mərhələdə məhkəmə hökmü dəyişdirilə, ləğv edilə və ya qüvvədə saxlanıla bilər.