Azərbacanın tanınmış iş adamı Hacı İbrahim Nehrəmli (İbrahim İbrahimov) tikinti işlərini dayandıraraq, əkinçilik təsərrüfatı ilə məşğul olmağa başlayıb.

Bunu Modern.az-a açıqlamasında hazırda Saatlıda olan iş adamı özü bildirib.

İ.Nehrəmli də əkin sahələrində su çatışmazlığının olduğunu dilə gətirib:

“Burada iş adamı Hikmət İsmayılova məxsus 1590 hektarlıq ərazidə taxıl əkmişik, su olmadığından onun 500 hektarı yandı. Təkrar əkin aparmaq istədik, amma dövlət də təkrar əkinə görə subsidiya vermir. Bu il quraqlıq oldu, çaylar da quruyub, çox çətindir”.

İş adamı evdən çıxmaq üçün qanuni icazəsinin olduğunu deyib:

“Bu elə bir sahədir ki, işi dayandırmaq olmaz. Ölkənin ərzaq təhlükəsizliyi üçün taxıl əkini, biçinilə bağlı məhdudiyyət yoxdur. “Meliorasiya və Su Təsərrüfatı” ASC İcra Hakimiyyətilə birlikdə rayonun su probleminin həllinə çalışır. İşlər bu şəkildə davam edərsə, ümid edirik ki, növbəti il üçün rayonda su problemi aradan qalxacaq.

İ.Nehrəmli qeyd edib ki, “Rom-Alpinos süd və ət məhsulları” MMC tərəfindən 1590 hektarda taxıl, 65 hektarda pambıq əkilib:

“Təsərrüfatın 5 minə qədər qoyun-quzusu, 2500 hektarlıq örüş sahəsi var. Əkilən taxılın 1000 hektarı suvarılıb, amma 500 hektarı yanıb. Pambığın suvarılmasında problem olmayıb. Saatlıda Muğan kollektorunun üstündə “Lenin kanalı”na su gəlmir. Əslində ikinci əkin əkmək istəyirdik. Amma dövlət tərəfindən təkrar əkin üçün subsidiya verilmədiyindən əkin aparmadıq. Qarğıdalı əkini üçün isə subsidiya ümumiyyətlə verilmədiyindən onu da əkmədik. Əvvəl arpa üçün 50 manat, kübrə üçün cüzi subsidiya verilirdi. İndi kübrəni fermerin öz ixtiyarına buraxıblar və 160 manat verirlər. Bu isə kübrəni görmür. Kübrəni az səpəndə 350 manat xərcimiz çıxır, 200 manat da cibindən pul qoyub suvarmalısan ki, xeyir götürəsən. Fermer əkəndən sonra sahəni suvarmayanda hər hektarda 200 manat ziyana düşür. Yağış yağmadığından ot da çıxmayıb. Dövlət örüş sahələrini əkin sahəsinə çevirməlidir ki, gələcəkdə ərzaq problemimiz olmasın. Bağlı şəraitdə heyvan saxlamaq imkanları genişləndiyindən örüş sahələrinin əkin sahəsinə çevirilməsində problem olmayacaq. Nəzərə almaq lazımdır ki, heyvanlar çöldə gəzəndə müxtəlif xəstəliyə də yoluxurlar”.