«The Independent» bu ölkədən qaçaq düşmüş bir nəfərə istinadən yazır ki, Şimali Koreyanın Pxençanq Qış Olimpiadasına göndərdiyi «gözəl azarkeş qızlar» əslində ölkənin vəzifəli rəsmilərinin istifadə etdikləri seks köləsiymişlər.

2008-ci ildə Cənubi Koreyaya qaçmış 42 yaşlı hərbi musiqiçi Li So-yon (Lee So-yeon) deyib ki, bu rəqqasə və müğənni qızlar Kommunist Partiyasının Mərkəzi Siyasi Bürosunda hər axşam keçirilən ziyafətlərdə və eyş-işrət məclislərində lüt soyunur və seks xidmətləri göstərirlər.

Şimali Koreyanın ali hakimiyyət orqanı olan siyasi büroya lider Kim Çen In və prezident Kim Yon-nam da daxildirlər.

Xanım Li «Bloomberg» saytına deyib: «Şimali Koreyanın estrada truppası Olimpiadaya gəlib, burada maraqlı rəqslər və mahnılar ifa edirlər. Lakin onlar təkcə Kim Çen Inın təbliğat maşını deyillər. Onlar həm də partiya ziyafətlərinə gedir və orada seksual xidmət göstərirlər».

Li deyir ki, belə ziyafətlər Mərkəzi Siyasi Büroda hər gün keçirilir.

«Onlar lap istəməsələr də, bədənləri ilə xidmət etməlidirlər, - deyir musiqiçi, - Qızlar partiya ziyafətlərində soyunmalıdırlar…»

«The Independent» yazır ki, Şimali Koreya rəhbərliyində belə ziyafətlərin artıq illərdir təşkil olunduğu düşünülür.

2009-cu ildə Cənubi Koreyaya qaçaq düşmüş 54 yaşlı Kim Hyunq-su isə deyir ki, Olimpiya oyunlarında Şimali Koreyanı təmsil edən idmançılar da kölədirlər.

«Qısaca desəm, bu idmançılar Kim Çen Inın və Şimali Koreya rejiminin idman kölələridirlər», - deyib Kim Hyunq-su.

Cənubi Koreyaya qaçaq düşənlərin məlumatlarına görə Şimali Koreyada həm idman, həm də seks kölələrini diqqətlə seçirlər. Onları elə şəxslərdən seçirlər ki, bu adamlar heç vaxt qaça bilməzlər.

Şimali Koreyadan Pxençanq Olimpiadasına gəlmiş qızlar doğrudan da Qərb mediasını valeh ediblər. Mətbuat onları «gözəllər ordusu» adlandırır.

Qrupun keçmiş üzvlərindən Han Seo-hi (Han Seo-hee) BBC-yə deyib ki, bu qızları fiziki gözəlliklərinə görə seçir, sonra isə üç ay müddətində intensiv kommunist ideologiyasına məruz qoyurlar.

Rejim onların son dərəcə sədaqətli olduqlarına inanmalıdır.