Rusiyanın NATO-ya əzələ nümayiş etdirmək üçün elan edilməyən təlimlər keçirməsi növbəti dəfə narahatlığa səbəb olub. Rusiya təlimləri Norveç sərhədi yaxınlığında keçirir, amma bununla bağlı Norveç hakimiyyətinə heç bir xəbərdarlıq etməyib.

İyunun 13-də Rusiyanın Şimal donanmasının gəmiləri hərbi təlimlərə başlayıb. Rusiya Müdafiə Nazirliyi bildirir ki, hərbi qulluqçulara döyüş təlimləri zamanı ciddi şəkildə təhlükəsizlik qaydalarına riayət etmələri göstərişi verilib.

Modern.az saytının “The Independent Barents Observer” nəşrinə istinadən xəbərinə görə, Barens dənizi ətrafındakı rayonlar sərnişin gəmiləri və təyyarələri üçün bağlanıb. 

Məlumata görə, Rusiyanın 36 hərbi gəmisi Barens dənizinə yerləşdirilib. Bundan başqa səmaya 20 döyüş təyyarəsinin qalxacağı gözlənilir.

Kolski yarımadasının sahili boyunca artilleriya, raket qurğuları daxil olmaqla 150-dən çox hərbi texnikanın yerləşdiriləcəyi gözlənilir. Rusiyanın təlimləri növbəti həftəyə qədər davam edəcək.

“Rusiya tərəfindən bir neçə ildir ki, donanma səviyyəsində yüksək fəallıq müşahidə olunur” – bunu Norveç komandanlığının Operativ Qərargahının nümayəndəsi, general-leytenant İvar Muen deyib.

Onun sözlərinə görə, Rusiya bu təlimlərlə bağlı Norveçə heç bir xəbərdarlıq etməyib.

Məlumatlara görə, atom sualtı gəmiləri də təlimlərdə iştirak edir. Amma onun hansı sinfə mənsub olduğu haqda məlumat verilmir.