Livanda “Hizbullah”ın iştirak etmədiyi yeni kabinetin formalaşdırılması ilə yeni bir siyasi mərhələ başlayıb. Bu, uzun illər ərzində ilk dəfədir ki, ənənəvi olaraq ölkənin siyasətinə ciddi təsir göstərən bu terror təşkilatı, baş nazir Nəvaf Salamın rəhbərlik etdiyi hökumətdən kənarda qalır.

Ərəb KİV-lərinin məlumatına görə, bu hadisə ABŞ və Səudiyyə Ərəbistanının birgə təzyiqləri nəticəsində baş verib. Riyad, vəliəhd şahzadə Məhəmməd bin Salmanın şəxsində, Livana maliyyə yardımı yalnız “Hizbullah”ın təsirinin məhdudlaşdırılması və onun silahsızlaşdırılması şərtilə təqdim ediləcəyini açıq şəkildə bəyan edib.

Livan vətəndaş müharibəsini dayandıran Təif (Səudiyyə Ərəbistanı) razılaşmasına əsasən, “Hizbullah” terror təşkilatı Livan ərazisində silahlı qüvvələrini qoruyub saxlamaq hüququ qazanan yeganə təşkilat oldu. Bu, onu ölkənin hərbi və siyasi səhnəsində əsas oyunçuya çevirdi. Lakin İsraillə son silahlı qarşıdurmalar və Bəşər Əsəd rejiminin zəifləməsindən sonra İranla əlaqələrin pisləşməsi təşkilatın mövqelərinə ciddi zərbə vurdu. Əsas hərbi və siyasi liderlərini itirən “Hizbullah” əvvəllər olduğu kimi geniş təsir imkanlarına malik deyil.

Hazırda həm Qərb ölkələri, həm də regiondakı ərəb dövlətləri “Hizbullah”ın tam şəkildə silahsızlaşdırılmasını tələb edirlər. Bu məsələ İsraillə son münaqişədən sonra xüsusilə aktuallaşıb.

Təşkilatın zəiflədilməsi üçün bir neçə əsas istiqaməti əhatə edən kompleks kampaniya başladılıb.

27 noyabr tarixində İsraillə atəşkəs razılaşması imzalandıqdan sonra “Hizbullah” Litani çayının şimalına çəkilmək məcburiyyətində qaldı. Azad edilmiş ərazilərdə Livan ordusu yerləşdirilib və o, hazırda terrorçuların hərbi infrastrukturlarını, o cümlədən silah anbarlarını və tunelləri məhv edir. İsrail aviasiyası bu bölgədəki qalan “Hizbullah” mövqelərinə zərbələr endirməyə davam edir və bu da terror təşkilatının imkanlarını daha da məhdudlaşdırır.

Digər vacib tədbir İran və İraqdan gələn uçuşların ciddi nəzarətə alınmasıdır. Beyrut hava limanında bu ölkələrdən gələn yüklərin və baqajların ciddi yoxlanışı tətbiq olunub. Rəsmi şəxslər yeni təlimatların olduğunu inkar etsələr də, mənbələr bildirir ki, əsas diqqət “Hizbullah”a pul köçürmələrinin qarşısını almağa yönəlib. Bu addım terrorçuların maliyyə imkanlarını sarsıtmağı hədəfləyir.

Livan-Suriya sərhədində vəziyyət də mürəkkəbləşib. Son vaxtlarda yerli qaçaqmalçılarla Suriya sərhədçiləri arasında baş verən silahlı qarşıdurmalar bu ərazidəki gərginliyi artırıb. Suriya sərhəd xidmətinin qərb bölgə komandiri Müəyyəd əl-Salama bəyan edib ki, “Hizbullah” terrorçuları narkotik və silah qaçaqmalçılarını dəstəkləməklə Suriyanın milli təhlükəsizliyinə təhdid yaradır. Suriya ordusu qaçaqmalçılara qarşı əməliyyatlara başlayıb ki, bu da Livandakı terror təşkilatının təsirini zəiflədir.

“Hizbullah”ın Livandakı təsiri həm xarici, həm də daxili amillərin təzyiqi ilə sürətlə azalır. Bir tərəfdən, təşkilat ənənəvi maliyyə və dəstək mənbələrinə çıxışını itirir, digər tərəfdən isə hərbi və diplomatik çağırışlarla üzləşir. “Hizbullah” terror təşkilatı hələ də əhəmiyyətli resurslara və hərbi imkanlara malik olsa da, onun zəiflədilməsi prosesi Livanın siyasi həyatında dönüş nöqtəsi ola bilər.