Yaxın günlərdə konklavın dəqiq vaxtı açıqlanacaq. Papalığın yenidən İtaliyaya qayıtmaq ehtimalı böyükdür. Əsas namizədlər də hazırda məhz onlardadır. Papanın Asiyadan seçilmə ehtimalı da yüksəkdir. Bu xristian dünyasının artan Çin nüfuzuna qarşı balanslaşdırma məsələsində vacib bir gediş ola bilər.

Heç şübhəsiz ki, Afrikada böyük nüfuza malik katolik dünyasından olan əsas namizəd Qanalı Turkson da düşünürəm ki, Papa olmağa ən vacib namizədlərdən biridir. Bu məncə İtalyanlardan sonra ən güclü ikinci namizəddir. Həm də unutmayaq ki, son illərdə Afrikada yüksələn xətlə artan bir Çin nüfuzu mövcuddur. Papa Fransisin dövründə Vatikan bir çox yeniliklərə getdi və islahatlar üçün addımlar atdı. Heç şübhəsiz ki, bu mühafizəkar xristian dünyasında rəğbətlə qarşılanan addımlar kimi qiymətləndirilmədi də. Hansı yöndən baxılmasından asılı olmayaraq Papa Fransis bunu etməli idi, ən azından o, ilk Cənubi Amerikalı Papa idi, dünyaya geniş açılımda islahatlara getməli idi də. Onu bu vəzifəyə gətirəndə ən azından həmin dövr üçün ondan tələb olunanlar da bu idi. Hər nə qədər argentinalı olsa da kökləri İtaliyaya bağlı idi.

Düşünürəm yeni seçiləcək Papa mühafizəkar qanadın nümayəndəsi olacaq, eynilə bir çox mənbələrdə düşünüldüyü kimi Papanın dünya proseslərinə müdaxiləsinin “hiss ediləcək” səviyyəyə gəlməsi mütləqdir. Yeni Papa həm də daha təlatümlü və müəmmalarla dolu bir gələcəyin Papası olacaq. Bütün dünyanın gözlədiyi vacib qərarlardan biri də  yaxın günlərdə Vatikanda veriləcək.

“Z” nəsli üçün dini dəyərlərin “arxaikləşdiyi” bir dünyada (mütləq əksəriyyətin düşüncəsinə görə) düşünürəm ki, kilsə üçün hazırkı məqam təsir etmə yönündə güclü bir “şansdır”.

Unutmayaq ki, 2 gün öncə Trampın bir maraqlı açıqlaması da var idi: “Amerikanı daha da dini bir dövlətə çevirəcəyik”. Hər şey plan üzrə gedərsə, Tramp ikinci hakimiyyəti dövründə prezident kimi ilk səfərini də məhz Vatikana, Papanı dəfn etməyə gələcək.