ABŞ-da hava limanında dispetçerlərlə təyyarələr arasında əlaqə 90 saniyə kəsilib. Bu, 3 həftə ərzində 3-cü oxşar hadisə idi. ABŞ-ın Kolorado ştatının Denver şəhərinin hava limanında aviadispetçer qülləsi ilə təyyarələr arasında əlaqənin kəsildiyi məlum olub. Federal Aviasiya Administrasiyasının (FAA) rəsmisi bildirib ki, əsas rabitə xətləri sıradan çıxıb, lakin radar işləyir.

“ABC News”un məlumatına görə, Denverdə hava dispetçerləri 90 saniyə ərzində təyyarələrlə əlaqə saxlaya bilməyiblər. Bundan sonra ehtiyat tezliklərdən istifadəyə qərar verildi.

Mayın 12-də günortadan sonra Denver Beynəlxalq Hava Limanı ətrafında təyyarələri istiqamətləndirən nəzarət-buraxılış məntəqəsində baş verən insident rabitəni sıradan çıxarıb, lakin radara təsir etməyib. FAA-nın hava hərəkətinə nəzarət direktoru Frank Makintoş bu məlumatı Nümayəndələr Palatasında keçirilən dinləmələrdə deyib.

Bu, təxminən üç həftə ərzində üçüncü belə hadisədir. Nyu-Cersi ştatının Nyuark şəhərində qüllə ilə təyyarələr arasında əlaqə qısa müddətə kəsilmişdi, sonra uçuşlar dayandırılmışdı.

***

FAA Denverdəki son insidentlə bağlı verdiyi açıqlamada Denver Hava Marşrutu Trafik İdarəetmə Mərkəzinin təxminən 90 saniyə ərzində əlaqəni kəsdiyini, bundan sonra əsas və əsas ehtiyat tezliklərin də sıradan çıxdığını bildirib. Açıqlamaya görə, fövqəladə hal tezliyindən daha sonra əlaqə üçün istifadə edilib.

“Nəzarətçilər təlimatları pilotlara ötürmək üçün başqa tezlikdən istifadə etdilər”, – deyən FAA vəziyyətin əməliyyatlara heç bir təsir göstərmədiyini bildirib.

Kaliforniya Nümayəndələr Palatasının üzvü Robert Qarsiya dünənki iclasda belə kəsilmələrin daha tez-tez baş verdiyinə diqqət çəkib və bunun hər dəfə daha çox narahatlıq doğurduğunu bildirib.

“Biz havaya nəzarətdə personal və avadanlıqla bağlı problemlərin olduğunu bilirik. Biz bilirik ki, bu problemlər bəzi hallarda onilliklər əvvəlinə gedib çıxır. Amma bu, hələ də dərhal həll edilməli olan ciddi bir sistem nasazlığıdır”, – Qarsiya deyib.