ABŞ, Ukraynanın Rusiyaya geniş miqyaslı pilotsuz uçuş aparatlarının (PUA) hücumları nəticəsində əvvəllər bildiriləndən daha az döyüş təyyarəsinin məhv edildiyini bildirdi.

“Reuters” agentliyinə adının açıqlanmasını istəməyən ABŞ təhlükəsizlik rəsmiləri bildiriblər ki, Ukrayna həftəsonu endirilən zərbələr zamanı Rusiyaya məxsus 20 hərbi təyyarəni vurub, onlardan 10-u məhv edib.

Bu rəqəm Kiyev administrasiyasının elan etdiyinin təxminən yarısıdır. Prezident Vladimir Zelenski Rusiyanın 41 təyyarədən ibarət donanmasının təxminən yarısının məhv edildiyini, qalanlarına isə ciddi ziyan vurduğunu iddia edib. Vurulan təyyarələr arasında “A-50” erkən xəbərdarlıq təyyarələri ilə Tu-95 və Tu-22M3 bombardmançılarının olduğu iddia edilib.

“Reuters” xəbər verir ki, Vaşinqton və Kiyevin paylaşdığı rəqəmləri müstəqil şəkildə təsdiqləmək mümkün olmayıb.

Rusiya Müdafiə Nazirliyi Ukrayna ordusuna məxsus pilotsuz uçuş aparatlarının (PUA) Murmansk, İrkutsk, İvanovo, Ryazan və Amur bölgələrindəki hərbi hava bazalarına hücum etdiyini, bəzi döyüş təyyarələrinin alovlandığını açıqlayıb.

Ukraynanın daxili təhlükəsizlik qurumu olan Ukrayna Təhlükəsizlik Xidmətinin (SBU) “Telegram” hesabından verilən açıqlamada, strateji qanadlı raketlər daşıyan döyüş təyyarələrinin vurulduğu bildirilib.

SBU-nun “Pavutini” (Hörümçək toru) adı altında həyata keçirdiyi əməliyyatda Rusiyanın strateji aviasiyasına 7 milyard dollar dəyərində ziyan dəydiyi iddia edilib.

“The New York Times” yazıb ki, Kreml bu hücuma “ciddi cavab verəcək”. Qeyd edilib ki, əməliyyat Rusiyanın strateji imkanlarına zərər verməklə yanaşı, Ukraynanın 600 dollarlıq pilotsuz uçuş aparatları ilə dəyəri 100 milyon dollardan çox olan hərbi təyyarələri məhv edə biləcəyini göstərib.

ABŞ prezidenti Donald Tramp da dünən Rusiya prezidenti Vladimir Putinlə görüşünü xatırladaraq, Rusiya liderinin Ukraynanın hücumuna cavab verməli olacağını açıq-aydın dediyini bildirib.

Zelenski bu gün verdiyi açıqlamada bildirib ki, Rusiya ötən gecə Donetsk, Xarkov, Odessa, Sumı, Çerniqov, Dnepropetrovsk və Xersonu 103 pilotsuz uçuş aparatı və ballistik raketlə vurub.

Ukrayna lideri hadisəni “terror hücumu” kimi qiymətləndirsə də, səlahiyyətlilər Priluki şəhərində 5 nəfərin öldüyünü, 6 nəfərin yaralandığını bildirib. Xarkov şəhərində 18 nəfər yaralanıb.

Digər tərəfdən, Ukrayna ilə Rusiya arasında yenidən qızışan münaqişə nüvə müharibəsi ilə bağlı narahatlıqları yenidən gündəmə gətirib.

“The Guardian” yazır ki, Ukraynanın vurduğu təyyarələr nüvə başlıqları daşıya bilirdi. Hesabatda Ukraynanın Rusiyanın “nüvə üçlüyü”nü hədəf aldığına diqqət çəkilir. Nüvə triadası ordunun havadan, qurudan və dənizdən nüvə raketləri atmaq qabiliyyətinə aiddir.

Trampın xüsusi nümayəndəsi Stiv Vtkoff və Putinin iqtisadi əməkdaşlıq üzrə xüsusi nümayəndəsi Kirill Dmitriev də Ukraynanın pilotsuz təyyarə əməliyyatını “Rusiyanın nüvə aktivlərinə” hücum kimi qiymətləndiriblər.