ABŞ və Britaniyaya məxsus iki kəşfiyyat təyyarəsinin Rusiyaya eyni gün, fərqli istiqamətlərdən yaxınlaşdığı bildirilir. “Newsweek” jurnalının yazdığına görə, bu hava əməliyyatı NATO-nun Rusiyaya qarşı artan müşahidə fəaliyyətinin bir hissəsi kimi qiymətləndirilir.

Murmansk və Kalininqrad istiqamətində kəşfiyyat uçuşları

ABŞ və Britaniyanın “RC-135” tipli hərbi kəşfiyyat təyyarələri 15 iyul tarixində İngiltərədən havalanaraq Rusiyanın şimal və qərb sərhədlərinə yaxın ərazilərdə uçuşlar həyata keçirib.

Məlumata görə, “Boeing” istehsalı olan Böyük Britaniya Hava Qüvvələrinin (RAF) “RC-135W” təyyarəsi İngiltərənin Vaddinqton bazasından qalxaraq Norveç, İsveç və Finlandiya hava məkanını keçib və Barens dənizi üzərindən Rusiyanın Arktik zonasında yerləşən Murmansk sahillərinə yaxınlaşaraq geri qayıdıb. Yerli saatla 08:11-də qalxan təyyarə 18:38-də bazaya enib.

Eyni gündə ABŞ Hərbi Hava Qüvvələrinə (USAF) məxsus “RC-135V” təyyarəsi də Mildenholl hərbi bazasından havalanaraq Niderland, Almaniya, Polşa və Litva üzərindən uçub və Rusiyanın Kalininqrad anklavı ətrafında dövrə vurub. Kalininqrad NATO-nun şərq cinahı olan Litva və Polşa ilə sərhəddə yerləşir.

Hər iki uçuş zamanı Rusiyanın hava məkanına birbaşa müdaxilə edildiyinə dair heç bir rəsmi məlumat yoxdur. Qeyd olunur ki, bu təyyarələr siqnal kəşfiyyatı (SIGINT) toplaya bilən və 30-dan çox heyətlə işləyən xüsusi kəşfiyyat təyyarələridir. Ekipaj heyətinə elektron müşahidə və radioelektron mübarizə üzrə mütəxəssislər də daxildir.

“Newsweek”: NATO Rusiyanın sərhədlərində fəallığı artırır

“Newsweek” qeyd edir ki, NATO mütəmadi olaraq Rusiyanın qərb sərhədləri boyunca müşahidə uçuşları həyata keçirir. Jurnalın təhlilinə görə, bu cür əməliyyatlar “NATO gölü” adlandırılan Baltik regionundakı vəziyyətlə bağlı Rusiyanın təhlükəsizlik narahatlıqlarını artırır.

Eyni zamanda, Rusiya da NATO hava məkanını pozmaqda və “hibrid təzyiq metodları” tətbiq etməkdə ittiham olunur.