Litva hökuməti, mümkün Rusiya təhdidinə qarşı vətəndaş müqavimətini gücləndirmək məqsədilə, uşaqlar da daxil olmaqla 22 mindən çox şəxsə pilotsuz uçuş aparatı (PUA) təhsili verməyi planlaşdırır.

Təhsil proqramı çərçivəsində, müdafiə və təhsil nazirliklərinin birgə layihəsi ilə 8–10 yaşlı ibtidai məktəb şagirdləri sadə PUA-ları hazırlamağı və uçurmağı öyrənəcək, lisey şagirdləri isə daha inkişaf etmiş modellərin komponentlərini dizayn edib istehsal edəcək.

Ölkə üzrə 9 mərkəz açılacaq

Müdafiə naziri Dovile Sakalin bildirib ki, 2028-ci ilə qədər 15.500 yeniyetmə və 7.000 uşağın PUA idarəetmə bacarığı qazanması hədəflənir. İlk təhsil mərkəzləri sentyabrda Yonava, Taurage və Kedainiay şəhərlərində açılacaq. 2028-ci ilə qədər ölkə üzrə toplam doqquz mərkəz fəaliyyət göstərəcək.

Layihəyə 3,3 milyon avro büdcə ayrılıb. Bu vəsait PUA-lar (FPV – birinci şəxsin baxış bucağı ilə), idarəetmə sistemləri, video ötürmə avadanlıqları və mobil tətbiqlərin təmin edilməsinə sərf olunacaq.

PUA-lar intensiv istifadə olunur

Litva, qonşuları Estoniya və Latviya kimi, Rusiya-Ukrayna müharibəsindən bəri yüksək təhlükə vəziyyətindədir. Ölkə sərhəd təhlükəsizliyində dronlardan intensiv istifadə edir və iyul ayında Belarusdan gələn iki Rusiya mənşəli PUA-sının hava sahəsini pozmasından sonra bu sahədə fəaliyyətini sürətləndirib.

Təhsil proqramları Litva Tüfəngçilər Birliyi və ölkənin təhsil qurumu tərəfindən həyata keçiriləcək.