Hollandiyada apreldə başlayan qanuni marixuana istehsalı və satışı ciddi problem yaradıb. Böyük istehsal sahələrindən yayılan kəskin qoxu, ətraf sakinlərinin həyatını çətinləşdirir və məsələ məhkəməyə daşınıb.

Hollandiya hökuməti bu il marixuana istehsalını qeyri leqal bazardan çıxarıb nəzarət altına almaq üçün pilot layihə həyata keçirib. Bu çərçivədə 10 bələdiyyədə fəaliyyət göstərən satış məntəqələri yalnız qanuni və sertifikatlı istehsalçılardan məhsul alır. Yeddi istehsalçı, dövlətin nəzarəti altında marixuana yetişdirir. Məqsəd həm keyfiyyət zəmanəti təmin etmək, həm də cinayətkar təşkilatların sektordakı təsirini azaltmaqdır.

180 min marixuana bitkisi

Ölkədə ən böyük istehsalçı, Hellevoetsluis şəhərində fəaliyyət göstərən “KanAdelaar” şirkətidir. Daha əvvəl pomidor yetişdirilən təxminən 5 hektarlıq istehsal sahələrində hazırda 180 min marixuana becərir.

Lakin istehsal sahəsindən yayılan kəskin qoxu ətrafda yaşayan sakinlərin səbrini daşırdıb. Xüsusilə qərbdən əsən küləyin təsirli olduğu günlərdə insanlar açıq havada otura bilmir. Evlərini “Reggae Musıc festıval”ına bənzətdiklərini bildirən sakinlər baş ağrısı, ürəkbulanma, yorğunluq və stress şikayətlərindən danışır.

2 minə yaxın şikayət qeydə alınıb

İndiyə qədər 300 fərqli şəxs tərəfindən 2 min 100-dən çox şikayət verilib. Ölçmələr göstərir ki, qoxu səviyyəsi normal həddən yuxarıdır və şikayətlər haqlıdır. Bələdiyyə şirkətə sentyabra qədər tədbir görməsi üçün vaxt verib. Əgər problem həll olunmasa, şirkət 500 min – 2 milyon avro arasında cərimə ödəməli olacaq.

Əgər “KanAdelaar” istehsaldan çəkilsə, satış məntəqələrində tədarük problemi yarana bilər. Bu isə ölkədə başlanan pilot layihənin uğursuz olma riskini artırır.

Hollandiya Səhiyyə Nazirliyi mövzuya ehtiyatlı yanaşır. Nazirliyin sözçüsü, “Bu, Hellevoetsluis Bələdiyyəsi ilə şirkət arasında bir məsələdir. Davam edən məhkəmə proseslərinə dair öncədən rəy vermək istəmirik”, – deyib

“Qapalı marixuana satış zənciri” pilot layihəsi dörd il davam edəcək. Bu müddətdə qanuni istehsal və satışın cəmiyyət sağlamlığı, cinayət nisbətləri və təhlükəsizlik üzərindəki təsirləri araşdırılacaq. Layihə sonunda geniş qiymətləndirmə hesabatı hazırlanacaq.