Almaniyada işsizlik 2025-ci ilin avqust ayında 3 milyon nəfərin üzərinə çıxaraq 2015-ci ildən bəri ən yüksək səviyyəyə çatdı. İqtisadi durğunluq və yay mövsümünün təsiri əsas amillər kimi göstərilir.

Federal İş Agentliyi (Bundesagentur für Arbeit) məlumatına görə, ölkədə işsizlərin sayı avqust ayında 3 milyon 25 min nəfərə yüksəldi. Bu, fevral 2015-dən bəri ilk dəfə üç milyon həddinin aşılması deməkdir. İşsizlik nisbəti də 0,1 faiz artaraq 6,4%-ə çatıb.

Agentliyin sədri Andrea Nahles, yay tətili dövrünün təsirinə diqqət çəkərək bildirdi: “Avqust ayında gözlədiyimiz kimi işsizlik üç milyonun üzərinə çıxdı”.

Nahlesə görə, əmək bazarı hələ də son illərdəki iqtisadi durğunluğun təsirini daşıyır, lakin bəzi müsbət siqnallar da görünür.

Bremen və Berlin hələ də ən yüksək səviyyədə

Avqust ayında işsizliyin bu səviyyəyə çıxması son dəfə 15 il əvvəl müşahidə olunmuşdu. Yay aylarında şirkətlərin daha az işçi qəbul etməsi və bir çox təcrübə proqramlarının sona çatması səbəbindən işsizlərin müvəqqəti artması normal haldır. Lakin bu ilki artım diqqət çəkən səviyyəyə çatıb.

İşsizlik nisbəti əyalət səviyyəsində belədir:

Bremen: 11,8%

Berlin: 10,5%

Ən aşağı işsizlik isə:

Bavyera: 4,2%

Baden-Württemberg: 4,7%

Rəqəmlər avqustun 13-nə qədər olan məlumatlara əsaslanır.

Şirkətlər istehsalı xaricə köçürür

Münhen mərkəzli İqtisadi Tədqiqatlar İnstitutu əmək bazarındakı zəifliyin səbəbini Almaniyadakı əlverişsiz şəraitlə əlaqələndirir. İnstitutun rəhbəri Klemens Fyust (Clemens Fuest) bildirib ki, bir çox şirkət satışların zəifliyi, uyğun kadr tapmaq çətinliyi və ya istehsalı başqa ölkələrə daşımaq qərarı səbəbindən işçi çıxarır.

Fyust Almaniyanın rəqib ölkələrlə müqayisədə yüksək bürokratiya yükü və vergilər ilə üzləşdiyini vurğulayıb. Hökumətin isə bu vəziyyətə struktur islahatlarla cavab verməli olduğunu bildirib: “Yalnız borclanmaq deyil, çətin amma zəruri struktur islahatlar da həyata keçirilməlidir”.

Bu yolla xüsusi investisiyaların artması və yeni iş yerlərinin yaranması mümkün olacaq.

Hökumət “investisiya sürətləndirici” paketi ilə çıxış edir

Federal Əmək Naziri Barbel Bas (Bärbel Bas) artan işsizliyin səbəblərini qlobal iqtisadi qeyri-müəyyənlik və Rusiya-Ukrayna müharibəsi ilə əlaqələndirdi. “İqtisadi küləklər hələ də əmək bazarında iz buraxır və qarşı tədbirlər zəruridir”.

SPD-li nazir, həll yolu olaraq hökumətin “investisiya sürətləndirici” paketinə işarə etdi. Bu paket şirkətlərin vergi yükünü xeyli azaltmağı hədəfləyir.

İşəgötürənlər və iqtisadçılar nə deyir

İşəgötürənlər Birliyi rəhbəri Rayner Dulger (Rainer Dulger) açıqlanan işsizlik rəqəmlərini son illərdə islahatlar aparılmaması ilə izah edib: “Artıq həqiqi bir islahat payızı lazımdır”.

Əmək Bazarı və Peşə Araşdırmaları İnstitutu (IAB) isə mövcud vəziyyətə baxmayaraq ehtiyatlı bir optimizm nümayiş etdirir. İnstitutun hər ay iş agentlikləri ilə keçirdiyi sorğulara əsasən hazırlanmış “əmək bazarı barometri” göstərir ki, üç il sonra işsizliyin artımı sona çatacaq. Eyni zamanda, əmək bazarında yenidən artım gözlənilir.