İlon Mask Almaniyada keçiriləcək yerli seçkilər öncəsi sağçı “Almaniya üçün Alternativ” (AfD) partiyasına açıq dəstəyini bir daha ifadə edib. Ruhr bölgəsində partiya son dövrlərdə yüksəlişdədir.

Mask sentyabrın 14-də keçiriləcək Şimali Reyn-Vestfaliya (NRW) yerli seçkiləri öncəsi “X” platformasındakı paylaşımında, “Ya Almaniya AfD-yə səs verəcək, ya da Almaniyanın sonu gələcək”, – yazıb. Bu açıqlama, son dövrlərdə əyalətdə yüksəlişdə olan AfD-yə marağı daha da artırmaq potensialına malikdir.

“NRW”də 13,7 milyon seçici var və bu, Almaniyanın ən çox əhalisi olan əyalətidir. Bu səbəbdən keçiriləcək yerli seçkilər federal səviyyədə siyasi meylləri ölçmək baxımından kritik test hesab olunur. Xüsusilə SPD-nin ənənəvi qalası olan Ruhr bölgəsində AfD-nin geniş bazaya sahib ola biləcəyi qiymətləndirilir.

Fevral ayında Gelsenkirçen şəhərində keçirilən səsvermədə AfD 24,7% səs toplayaraq SPD-ni az fərqlə geridə qoyub. Duisburg II seçki bölgəsində isə AfD 24,6% səs ilə SPD-dən sonra ikinci yerdə qərarlaşıb. Halbuki 2020-ci il yerli seçkilərində AfD əyalət üzrə yalnız təxminən 5% səs qazanmışdı.

İlon Mask AfD-yə dəstəyini ilk dəfə açıqlamır. 2025-ci ilin əvvəlində keçirilmiş ümumi seçki kampaniyasında da o, “Almaniyanı yalnız AfD qoruya bilər” ifadəsini paylaşmışdı.

“Tesla”nın Brandenburqdakı Grünheide fabrikində istehsal həyata keçirən Mask dəstəyini yalnız sözlə ifadə etməmiş, AfD lideri Alis Vaidel (Alice Weidel) ilə X platformasında görüşüb. Həmçinin video vasitəsilə AfD-nin Halle şəhərindəki seçki mitinqində iştirak edib. Orada etdiyi çıxışda Mask, “AfD Almaniya üçün ən yaxşı ümiddir və Alman olmaqla fəxr etmək problem deyil”, – deyib.

Maskın siyasi mövqeyi, xüsusilə Almaniyadakı iş dünyasında öz əksini tapmağa başlayıb. Bəzi Alman şirkətləri Maskın sahibi olduğu “X” platformasındakı aktivlərini sonlandırmaq qərarı alıb. Bu addım, firmaların platformaya olan investisiya istəklərini də azaldır.

Bununla yanaşı, Tesla qlobal səviyyədə də təzyiq altındadır. İyul ayında şirkət ardıcıl ikinci dəfə mənfəət azalması ilə üzləşib. İlin ikinci rübündə Tesla 1,17 milyard dollar xalis mənfəət açıqlayıb ki, bu keçən ilin eyni dövrünə nisbətən 16% azalma deməkdir. Gəlirlər isə 12% azalaraq 22,5 milyard dollara düşüb. Bu azalmanın əsas səbəbi təslimatların 13,5% geriləyərək 384.122 avtomobilə enməsidir.