Neft fyuçerslərinin qiyməti bu gün dəyər qazanmağa davam edib. Ticarətçilərin diqqəti OPEC+ hasilat düzəlişlərindən çox, artan geosiyasi gərginliklərə yönəlib.

Qərbi Texas xam neftinin bir bareli 63,27 dollara çataraq 1,6% bahalaşıb, “Brent” markalı neft isə 1,6% artaraq 67,06 dollara yüksəlib.

OPEC+-ın könüllü hasilat ixtisarlarını mərhələli şəkildə aradan qaldıracağını açıqlamasına baxmayaraq, bazarlar bu addımı böyük ölçüdə görməməzliyə vurub. “BOK Financial” şirkətindən Dennis Kissler qeyd edib: “Fyuçerslər yenidən konsolidasiyaya keçib, çünki əlavə OPEC+ hasilatı gözləniləndən daha kiçik olduğu üçün əksər treyderlər tərəfindən əhəmiyyətsiz sayıldı”.

Bunun əvəzində diqqət Rusiyanın neft ixracını hədəfə ala biləcək yeni ABŞ sanksiyalarına yönəlib. Məlumatlara görə, Donald Tramp administrasiyası yalnız Rusiya istehsalçılarını deyil, həm də rus xam neftinin alıcılarını əhatə edə biləcək daha sərt məhdudiyyətlər üzərində işləyir.

Kisslerin sözlərinə görə, mövcud sanksiyaların qlobal neft axınlarına təsiri məhdud olsa da, diqqətin alıcılara yönəlməsi neft bazarında yenidən dalğalanma yarada bilər.

Hazırda OPEC+ təklif dəyişikləri qiymətlərdə nəzərə alınsa da və tələblə bağlı narahatlıqlar qalmaqda davam etsə də, xüsusilə Rusiya ilə bağlı geosiyasi gedişlərin qısamüddətli qiymət hərəkətlərinə istiqamət verəcəyi gözlənilir.