Avqustun 6-da Kiyev qüvvələrinin Rusiya sərhədindəki Kursk bölgəsində başlatdığı hücuma baxmayaraq, Moskva münaqişənin episentri olan Ukraynanın şərqindəki Donetskdə irəliləməyə davam edir. Rusiya prezidenti Vladimir Putin sentyabrın 5-də Ukraynanın şərqində, o cümlədən Donetskin də daxil olduğu sənayeləşmiş Donbass bölgəsinə tam nəzarət etmək əzmində olduğunu təkrarlayıb.

Bu arada Ukrayna təhlükəsizlik mənbəsi PUA-ların bir gecədə Rusiyanın Voronej vilayətindəki sursat anbarını bombaladığını açıqlayıb. Mənbə onu da bildirib ki, Kiyev bu anbardan Ukraynaya sursat və təchizat daşımaq üçün istifadə olunduğunu düşünür.

Voronej qubernatoru Aleksandr Qusev “Telegram”da verdiyi açıqlamada bölgədəki yanğından sonra “partlayıcıların yerləşdiyi obyektlərin” partladığını, yerli fövqəladə vəziyyət elan olunduğunu, bir neçə yüz insanın təxliyə edildiyini və əsas yolun bağlandığını bildirib.

Qubernator “Telegram”da yazıb ki, Rusiya hava hücumundan müdafiə sistemləri səhər tezdən Ukrayna PUA-sını aşkarlayıb və vurub. Qubernator əlavə edib ki, heç kim xəsarət almayıb. Vurulan PUA partlayıcı maddələr olan obyektlərə çırpılıb. Nəticədə anbardakı maddələr alışıb və güclü yanğın baş verib. Qusev bu obyektlərin mahiyyəti ilə bağlı hər hansı təfərrüat açıqlamayıb. Qubernator həmçinin bildirib ki, yanğınla əlaqədar “bir kəndin sakinləri qonşu şəhərlərə köçürülüb”. “Telegram”dakı Rusiya kanalları yanğının silah-sursat anbarında baş verdiyini yazıb.

Adının çəkilməsini istəməyən ukraynalı mənbə “Reuters” agentliyinə bildirib ki, əməliyyatı Ukrayna Daxili Təhlükəsizlik Xidməti həyata keçirib. “Hazırda bölgədə dörd yerdə güclü yanğın hələ də davam edir və döyüş sursatları davamlı olaraq partlayır”, – deyən mənbə, anbarın Soldatskoye şəhərində yerləşdiyini və Ukraynanın nəzarətində olan ərazidən təxminən 130 kilometr aralıda olduğunu bildirib.

Bir ay əvvəl Kursk bölgəsində böyük Ukrayna hücumuna məruz qalan Rusiya, demək olar ki, hər gün ərazisinə atılan Ukrayna PUA-larını zərərsizləşdirdiyini açıqlayır.

Kiyev bu hücumları Rusiyanın iki ildən artıqdır Ukraynanı bombalamasına cavab olaraq həyata keçirdiyini və əsasən hərbi və sənaye obyektlərini hədəfə aldığını bildirir.

Ukrayna prezidenti Vladimir Zelenski sentyabrın 6-da Almaniyanın cənub-qərbindəki Ramşteyn aviabazasında Ukrayna Müdafiə Əlaqə Qrupunda çıxışı zamanı vurğuladığı kimi, İtaliyanı ölkəsini uzaqmənzilli silahlar və hava hücumundan müdafiə sistemləri ilə təmin etməyə çağırıb.

“Bloomberg” agentliyinə xəbər verir ki, Ukrayna tez-tez Qərb müttəfiqlərini öz qüvvələrinə raket və bombalarla hücum üçün istifadə edilən hərbi təyyarələri məhv etmək üçün Rusiya daxilində uzaqmənzilli silahlarla zərbələr endirməyə icazə verməyə çağırıb. Lakin ABŞ Müdafiə Nazirliyi bu cür dərin zərbələrin “az strateji dəyəri” olacağını bildirib.