Ukraynanın son aylarda Rusiyanın neft emalı zavodlarına (NEZ) endirdiyi zərbələr ölkədə benzin istehsalının azalmasına və bazarda qıtlıq yaranmasına səbəb olub.

VAXT.AZ “Kommersant” qəzetinə istinadən xəbər verir ki, Milli Birja Qiymət Agentliyinin məlumatlarına görə, mayın 8-də birja hərraclarında 32,64 min ton benzin satılıb. Bu, əvvəlki ticarət günü ilə müqayisədə 5,9% azdır.

Ən çox istifadə olunan yanacaq növlərindən olan Aİ-92 markalı benzinin satışı 8,9% azalaraq 20,34 min tona düşüb. Aİ-95 markalı benzinin satışı isə cüzi artaraq 12,24 min ton təşkil edib.

Bununla yanaşı, tələb Aİ-92 üzrə 23,46 min ton, Aİ-95 üzrə isə 26,34 min ton olub. Bu göstəricilər bazarda təklifin tələbi tam qarşılamadığını göstərir.

“Kommersant”ın bazar iştirakçıları arasındakı mənbəsinin sözlərinə görə, yay mövsümü ərəfəsində Aİ-95 markalı benzin üzrə artıq real təklif çatışmazlığı yaranıb.

Mənbə qeyd edib ki, yay aylarında vətəndaşların məzuniyyət səfərləri artdığı üçün Aİ-95 benzininə tələbat Aİ-92 ilə müqayisədə daha sürətlə yüksəlir.

Yanacaq çatışmazlığının əsas səbəbi Ukrayna pilotsuz uçuş aparatlarının (PUA) zərbələri nəticəsində iri NEZ-lərdə aparılan planlaşdırılmamış təmir işləridir.

Aprel və mayın əvvəlində altı böyük zavod müvəqqəti olaraq fəaliyyətini dayandırıb. Nəticədə Rusiyada gündəlik neft emalı həcmi 4,69 milyon barelə enib ki, bu da 2009-cu ildən bəri ən aşağı göstəricidir.

Sahə nümayəndələrinin qiymətləndirməsinə görə, bəzi zavodlarda bərpa işləri bir aydan çox davam edə bilər.

Mayın əvvəlində neft məhsullarının yüklənmə müddəti orta hesabla iki-dörd həftə uzanıb. Bu isə topdansatış şirkətlərinin ehtiyat toplamaq imkanlarını məhdudlaşdırır və yay aylarında benzin qıtlığı riskini artırır.

Ekspertlərin fikrincə, vəziyyət pisləşərsə, Rusiya hökuməti daxili bazarı təmin etmək üçün benzin ixracını dayandıra bilər.

2023 və 2024-cü illərdə də oxşar hallarda Moskva benzin ixracını müvəqqəti dayandırmışdı. Bu dəfə də artan tələb və zəif təklif fonunda analoji addımların atılması istisna edilmir.