Rusiyanın Cənub və Qərb hərbi dairələri qoşunları təlimlərdən sonra dislokasiya yerlərinə qaytarmağa başlayıb. Bu barədə Rusiya Müdafiə Nazirliyi məlumat yayıb.

“Cənub və Qərb hərbi dairələrinin bölmələri tapşırıqları yerinə yetirərək artıq dəmir yolu və avtomobil nəqliyyatına yüklənməyə başlayıb və bu gündən öz hərbi qarnizonlarına hərəkətə başlayacaqlar. Ayrı-ayrı bölmələr hərbi kolonların tərkibində təkbaşına yürüş edəcəklər”. Bu barədə Rusiya Müdafiə Nazirliyinin sözçüsü İqor Konaşenkov bildirib.

Bunun ardınca Rusiya Dövlət Duması prezidenti Vladimir Putinə “DNR” və “LNR”nin tanınması xahişi ilə müraciət göndərmək qərarına gəlib. Bu barədə qərar parlamentin plenar iclasında qəbul edilib.

Deputatlar Kommunist Partiyasının hazırladığı sənədi qəbul etdilər. Qərar birbaşa Rusiya Federasiyasının prezidentinə müraciət göndərməyi nəzərdə tutur. Onun lehinə 351 deputat, əleyhinə 16 deputat səs verib, bir deputat bitərəf qalıb.

“Atlas” Araşdırmalar Mərkəzinin rəhbəri, politoloq Elxan Şahinoğlu bu iki hadisəyə münasibət bildirib. “Rusiya prezidenti Vladimir Putin Qərb liderlərindən aldığı müxtəlif xəbərdarlıqlar qarşılığında Ukrayna ilə sərhəddən qoşunlarını geri çəkməyə qərar veribsə, Dövlət Duması nədən Donbass separatçılarını tanımaq məqsədilə Kreml sahibinə müraciət edib? Bəllidir ki, Dövlət Dumasında çoxluq Putinin nəzarəti altındadır. Deməli, Dövlət Duması məhz Kremlı sahibinin istəyi ilə “separatçıların tanınması müraciətinin” məhz fevralın 15-də ona təqdim edilməsini təşkil edib. Kreml sahibinin iki məqsədi var. Birincisi Qərbin təzyiqləri qarşısında tam güzəştə getmədiyini göstərməkdir. İkincisi isə Ukraynaya qarşı təzyiqi “separatçıları tanıyaram ha...” formasında davam etdirməkdən ibarətdir.

Putin “demokl qılıncını” Kiyevin başı üzərində saxlayacaq. Onun separatçıları rəsmən tanıması Minsk razılaşmalarından çıxması anlamına gələcək. Putin hazırda bu addımı atmaq istəmir, çünki özü Kiyevdən həmin razılaşmaların yerinə yetirilməsini tələb edir. Ancaq Kreml sahibi “separatçıları tanıya biləcəyi” alətini daima əlində saxlayacaq ki, istənilən an ondan istifadə edə bilsin”.