İran Prezidentinin Strateji Araşdırmalar Mərkəzinin rəhbəri Məhəmmədsadiq Xəyyatiyan bəyan edib ki, bu ölkənin bəzi sosial qruplarında mühacirət etmək istəyi 40 faizdən çox artıb.

“Bu hesabata əsasən, universitet professorları və tədqiqatçılarının 53 faizi, həkim və tibb bacılarının 45 faizi, biznes fəallarının 43 faizi, tələbələr və universitet məzunlarının 40 faizi İrandan mühacirət etmək istəyir”, – deyə o “Mədara” saytına müsahibəsində bildirib.

Xəyyatiyan sosial media təbliğatının ölkədən istedadlı şəxslərin mühacirət etməsində böyük rol oynadığını və bunun qarşısının alınması üçün planlar hazırlanıldığını iddia edib.

***

Xaricə getmək istəyənlərdən söz düşmüşkən, son həftələr xüsusilə xaricdən ölkəyə qayıdanlardan götürülən COVİD-19 testlərin əksəriyyəti pozitiv çıxıb və bu koronovirusa qarşı xüsusi rejim şərtlərinin davam etdirilməsinə əsas verir.

Epidemioloq və Koronavirusa Qarşı Mübarizə Qərargahının Elmi Komitəsinin üzvü Həmid Suri sözlərinə görə İranda virusun yenidən yayılmağa başlayıb və rəsmi rəqəmlər həqiqəti əks etdirmir.

Onun sözlərinə görə, Xuzistan və Mazəndəran əyalətlərində koronovirusa yoluxma halları şiddətli səviyyədə çoxalıb.

“Səhiyyə Nazirliyi COVİD-19-a yoluxmalarla bağlı ictimaiyyətə və mütəxəssislərə dəqiq məlumat vermir”, – deyə Həmid Suri bildirib.