Ukraynanın sabiq baş naziri Yuliya Timoşenko prezidentliyə namizədliyini irəli sürmək niyyətində olduğunu rəsmən bildirib.

Virtualaz.org bildirir ki, Y.Timoşenko bunu bu gün Kiyevdə keçirdiyi brifinqdə bəyan edib.

«Bəli, mən prezident seçkilərində iştirak etmək istəyirəm», - deyə o vurğulayıb.

Y.Timoşenkonun sözlərinə görə, o, martın 29-da «Batkivşina» partiyasının qurultayında onun prezidentliyə namizədliyinin irəli sürülməsini xahiş edəcək.

Qeyd edək ki, Ukraynada növbədənkənar prezident seçkiləri mayın 25-də keçiriləcək.

Xatırlatması: Martın 27-dək Ukrayna Mərkəzi Seçki Komissiyası yalnız bir namizədi - baş prokurorun sabiq müavini Renat Kuzmini rəsmən qeydə alıb.

MSK-ya Regionlar Partiyasından Mixail Dobkin, Sergey Tiqipko, sabiq baş nazir müavini Yuri Boyko, Radikal Partiyanın lideri Oleq Lyaşko, Ukrayna Yəhudi Konqresinin rəhbəri Vadim Rabinoviç, deputat Anatoli Qritsenko, Sağ Sektorun lideri Dmitri Yaroş və Kommunist Partiyasının sədri Pyotr Simonenko da müraciət edib.

Bu həftəsonu isə UDAR Partiyasından Vitali Kliçkonun, Azadlıq Partiyasından Oleq Tyaqnibokun namizədliyi rəsmiləşəcək.