İşğalçı qüvvələrin Xersondan çıxarılması Rusiya Prezidenti Vladimir Putinlə “qırğı” fraksiyası arasında parçalanmaya səbəb olur. Bu qənaətə ABŞ mərkəzli Müharibə Araşdırmaları İnstitutu gəlib.

İnstitutunun hesabatına görə, Putinin hərbi qüvvələrinin Ukrayna hökumətini devirmək və bütün Ukraynanı ələ keçirmək kimi maksimalist məqsədlərinə nail ola bilmədiyi üçün ifrat ideoloji müharibəmeyilli seçicilərin bir hissəsini sakitləşdirmək getdikcə çətinləşir.

Vladimir Solovyov kimi ifrat sağçı təbliğatçılar getdikcə Kremldən və ali hərbi komandanlıqdan Ukraynanın məhv edilməsi ilə bağlı bütün vədləri yerinə yetirməyi tələb edirlər.

Xersonun itirilməsi Kerç körpüsünün partladılmasından sonra tərəfdarlarının gözündə Putin üçün yeni məğlubiyyətdir.

Analitiklər Putinin tənqid dalğasını “demək olar ki, misli görünməmiş” adlandırırlar. Yəqin ki, televiziyada senzuranın artması da bununla əlaqədardır, çünki bir çox təbliğatçılar geri çəkilmənin fəsadlarını ya gözardı edir ya da yüngül formada təqdim etməyə çalışır.

Eyni zamanda nizami qoşunların və Putinin Xersonda məğlubiyyəti “vaqnerçilər”in və onların lideri Priqojinin təsirini daha da gücləndirir.

***

“Xersonun azad edilməsi Ukraynanın mühüm qələbəsidir”. Bunu Ağ Evin milli təhlükəsizlik müşaviri Cek Sallivan deyib.

Sallivan Xersondakı qələbənin strateji əhəmiyyətini də izah edib: “Çünki Odessa və Qara dəniz kimi sahili kimi yerlərdə təhlükə əvvəlkinə nisbətən daha az olacaq”.

O vurğulayıb ki, bu, müharibənin sonu deyil, amma vacib məqamdır: “Xersonun azad edilməsi isə ilk növbədə Qərbin dəstəyi və Ukrayna Silahlı Qüvvələrinin məharəti ilə bağlı idi”.

Qeyd edək ki, Ukrayna Silahlı Qüvvələri Xersona daxil olub.