“Wall Street Jounal”nin (WSJ) keçən həftə çıxan xəbərində “Tesla”, “Space” və “X” sosial media platformasının sahibi İlon Maskın ABŞ-ın keçmiş prezidenti və Respublikaçılar Partiyasından yenidən namizəd olan Donald Trampa seçki kampaniyası üçün ayda 45 milyon dollar ianə edəcəyi iddia edilib. Mask bu iddialara cavab verib və belə bir söz demədiyini bildirib.

***

İlon Mask sosial media hesabında bu iddialara cavab verib. “Mən heç vaxt Donald Trampın seçki kampaniyasını dəstəkləmək üçün hər ay 45 milyon dollar bağışlayacağımı deməmişəm”, - Mask deyib.

Mövzu ilə bağlı məlumatı olan insanlara əsaslanaraq WSJ-nin xəbərində Maskın Trampın kampaniyasına ayda təxminən 45 milyon dollar ianə verməyi planlaşdırdığı iddia edilmişdi.

***

İyulun 13-də seçki mitinqində Donald Trampa silahla hücum edildikdən sonra Mask ilk dəfə Trampı dəstəklədiyini açıq şəkildə bildirdi. Sosial media hesabında tez-tez demokratları tənqid edən Mask, hücuma məruz qaldıqdan sonra prezidentlik yarışında Trampı dəstəklədiyini açıq şəkildə bildirdi.

ABŞ-da prezident seçkiləri əsasən donorlar tərəfindən maliyyələşdirilir, ona görə də ianələr seçki yarışında mühüm rol oynayır.