Ukraynanın Rusiyanın Kursk ərazisinə kütləvi əks-hücumunun əks-sədaları davam edir. Ukrayna prezidenti Vladimir Zelenski Kursk vilayətində 74 yaşayış məntəqəsinin ələ keçirildiyini və lazım gələrsə, orada hərbi komandanlıq mərkəzlərinin yaradılacağını bəyan edib.

ABŞ prezidenti Co Bayden dünən Kursk əməliyyatı ilə bağlı verdiyi ilk açıqlamada “vəziyyət Putin üçün əsl dilemma yaradır” deyib.

Bayden Kiyev administrasiyası ilə daim əlaqə saxladıqlarını bildirsə də, Ağ Evin sözçüsü Karin Jan-Piyer əməliyyatla bağlı əvvəlcədən məlumatlandırılmadıqlarını bildirib.

Digər tərəfdən, Böyük Britaniya Ukraynanın özünü müdafiə etməsi lazım olduğu hallarda Rusiya ərazisinə hücum üçün Britaniya istehsalı olan silahlardan istifadə oluna biləcəyini bəyan edib.

Ancaq İngiltərə və Fransanın birgə istehsal etdiyi uzun mənzilli “Storm Shadow” raketləri bu siyahıya daxil edilməyib.

Bəs, Kiyev qüvvələrinin Rusiya ərazisinin təxminən min kvadratkilometrini ələ keçirdiyi iddia edilən əməliyyat 2022-ci ilin fevralında Rusiya prezidenti Vladimir Putinin sərəncamı ilə başlayan müharibənin gedişatını dəyişəcəkmi?

“Associated Press” agentliyinin təhlilində Kursk əməliyyatının Ukrayna üçün “böyük qumar” olduğu qiymətləndirilir. Bildirilir ki, Kiyev “nüvə silahı olan və məhdud resurslara əsaslanan düşmənə qarşı müvəffəqiyyət zəmanəti olmayan hücuma cəhd edib”.

Bununla belə, təhlil Kursk əməliyyatının məqsədinin hələ də aydın olmadığını göstərir və aşağıdakı sualı verir: “Ukrayna tutduğu ərazini qoruyacaq, Rusiya ərazisində irəliləyişini davam etdirəcək, yoxsa geri çəkiləcək?”

Bundan əlavə, əməliyyatın ötən yay uğursuz əks-hücumdan sonra Ukraynanın əhval-ruhiyyəsini artırdığı vurğulanır və aşağıdakı şərhlər paylaşılır: “Siyasi baxımdan bu hücum Rusiyanın vəziyyətini dəyişdi və Ukraynanın getdikcə daha əlverişsiz atəşkəs şərtlərini qəbul etməyə məhkum göründüyü münaqişənin şərtlərini yenidən müəyyənləşdirdi”.

Kurskdan başqa, Ukrayna iki gündür Rusiyanın Belqorod vilayətində də hücumlar həyata keçirir. Rusiyanın fövqəladə hallar naziri Aleksandr Kurenkov Ukrayna ordusunun hücumları səbəbindən bölgədə federal fövqəladə vəziyyət elan edildiyini açıqlayıb. Bu bölgələrdən ən azı 200 min Rusiya vətəndaşının təxliyə edildiyi bildirilib.

Dünən verdiyi açıqlamada Zelenski Kurskda 100 rus əsgərinin əsir düşdüyünü və bu şəxslərin gələcəkdə mümkün əsir mübadiləsində iştirak edəcəklərini bildirib.

Böyük Britaniya mediası BBC-nin təhlilində Ukraynanın sərhədyanı əməliyyatlarla “cəsarətli addım ataraq Qərb ölkələrinin etibarını geri qazandığı” yazılır: “Putin və Kreml üçün bu, tamamilə dözülməz vəziyyətdir və onlar Kiyevə güzəştə getmək niyyətində deyillər”.

Ukrayna avqustun 6-da başlayan Kursk əməliyyatı ilə müharibədə ən böyük sərhəd əməliyyatını təşkil edir.

Rusiya Müdafiə Nazirliyi Ukraynanın ümumilikdə ən azı 2030 əsgər, 35 tank və 179 zirehli texnika itirdiyini iddia edib. Kiyev itklər haqqında məlumat paylaşmır.