Tarif dərəcəsi bəzi polad və alüminium məmulatları və akkumulyatorlar üçün 25 faiz, yarımkeçiricilər və günəş batareyaları üçün 50 faiz, elektromobillər üçün 100 faiz olacaq.

ABŞ Ticarət Nümayəndəliyinin Ofisi (USTR) Çindən idxal edilən polad və alüminium, yarımkeçiricilər, elektrik avtomobilləri, akkumulyatorlar, kritik minerallar və günəş batareyaları kimi məhsullara gömrük rüsumlarının artırılması planının yekun variantını açıqlayıb.

USTR tərəfindən edilən açıqlamada, may ayında açıqlanan gömrük rüsumlarının artırılması ilə bağlı təkliflərin böyük ölçüdə qəbul edildiyi və araşdırma nəticəsində Amerikalı sahibkar və işçilərin Çinin ədalətsiz ticarət təcrübələrindən qorunması üçün müxtəlif yeniləmələrin edildiyi bildirilib.

Bu yeniliklərlə bağlı məlumatların paylaşıldığı açıqlamada, üz maskaları, tibbi əlcəklər, iynələr və şprislərin tarifləri üçün yeni dövrlər və tariflərin müəyyən edildiyi, mayın 14-dən əvvəl sifariş edilən gəmi-sahil kranları üçün istisna edildiyi və günəş enerjisi istehsalı avadanlıqları üçün təklif edilən istisnaların ləğv edildiyi bildirilib.

ABŞ-ın Ticarət Nümayəndəsi Katerina Tai verdiyi açıqlamada, bu addımların ABŞ administrasiyasının ədalətsiz ticarət təcrübələrinə qarşı Amerikalı işçiləri və şirkətləri üçün hərəkətə keçmə öhdəliyini vurğulayıb.

Bildirilib ki, sözügedən gömrük rüsumlarının böyük hissəsi sentyabrın 27-dən qüvvəyə minəcək.

***

May ayında ABŞ administrasiyası kritik sənayelərdə yerli istehsalı dəstəkləmək üçün Çindən idxal edilən polad və alüminium, yarımkeçiricilər, elektrik nəqliyyat vasitələri, akkumulyatorlar, kritik minerallar və günəş batareyaları kimi məhsullara gömrük rüsumlarını artırmaq qərarına gəlib.

Ağ Evdən verilən açıqlamada Çinin dünya bazarlarını süni şəkildə ucuz ixrac məhsulları ilə doldurduğu, tarif artımının tətbiq olunduğu məhsullar arasında 18 milyard dollarlıq idxalın olduğu bildirilib.