Macarıstanın baş naziri Viktor Orban Macarıstanın dövlət radiosu “Kossuth”a müsahibəsində Ukraynanın sürətlə Avropa Birliyinə (AB) qəbul edilməsinə qəti şəkildə qarşı çıxıb. Macarıstanın Ukrayna ilə bağlı siyasətində AB-də tək olduğunu, lakin immiqrasiya ilə bağlı keçmişdə olduğu kimi, bu vəziyyətin zamanla dəyişəcəyini söyləyən Orban, “Əgər başqa səbəblərdən olmasa da, iqtisadi səbəblərdən ötrü hamı bunu anlayacaq. Ukraynanın AB üzvlüyü birlik üçün iqtisadi fəlakət olacaq”, – deyib.

Orban Ukraynanın AB-yə daxil olmasının birliyə böyük baha başa gələcəyini və Avropa Birliyinin belə bir xərci qarşılayacaq maliyyə imkanlarının olmadığını bildirib. “Avropa Komissiyası AB ölkələrinə bu məqsədlə borc götürməyi təklif edir, lakin “COVİD-19” pandemiyası zamanı iqtisadiyyatı stimullaşdırmaq üçün istifadə edilən kreditlər üzrə qarşıdan gələn faiz ödənişləri ilə vəziyyət daha da mürəkkəbləşir”, – deyib.

***

Yeni kreditlər götürməyin pis fikir olduğunu bildirən Orban, “Daha əvvəl çıxarılan böyük bir kreditin geri qaytarılması yaxınlaşır. Həm faiz, həm də əsas borc ödənişləri 2027-28-ci illərdə həyata keçiriləcək. Hesablamalara görə, bu, AB büdcəsinin yüzdə 20-ni istehlak edəcək”, – deyib.

Brüsselin Ukraynaya daha çox maliyyə və hərbi yardım çağırışlarını tənqid edən Orban, Macarıstanın öz milli maraqlarını qorumaq məcburiyyətində olduğunu ifadə edərək, “Ukraynaya üç ildir nə silah, nə də pul göndərmişik”, – deyib.

***

AB-nin Ukraynada müharibənin davam etdirilməsi ilə bağlı dəstəyinin əvvəlki qədər güclü olmadığını vurğulayan Macarıstan baş naziri, “Hər kəs görür ki, bu müharibə uduzulub. Müharibəyə müdaxilə etmək pis bir qərar idi”, – deyib.

***

Macarıstan Avropa Birliyinə üzv 27 ölkənin dövlət və hökumət başçılarının dünən Brüsseldə bir araya gəldiyi sammitdə Ukrayna ilə bağlı bəyannaməyə növbəti dəfə veto qoyub. Veto qoyulmuş yekun bəyannamədə Ukraynanın sürətləndirilmiş AB-yə üzvlük prosesi və milyardlarla avro dəyərində hərbi dəstək ilə bağlı bəyanatlar yer alıb.