Mask mişarını götürərək Mərkəzi Kəşfiyyat İdarəsinə (MKİ) yollandı. ABŞ-ın məşhur xarici kəşfiyyat agentliyində ixtisarlara nəzarət etmək üçün MKİ direktoru Con Ratkliff ilə görüşməyə hazırlaşan Mask Trampın “kölgə kabineti”nə rəhbərlik etməyə davam edir.

Dünyanın ən varlı adamı Elon Mask bazar ertəsi prezident Donald Trampın baş müşaviri kimi ABŞ-ın xarici kəşfiyyat agentliyi olan MKİ-yə baş çəkəcək.

İdarənin sözçüsü cümə günü bildirib ki, Mask agentliyin səmərəliliyini müzakirə etmək üçün direktor Con RatKliff ilə görüşəcək.

MKİ bu yaxınlarda Tramp administrasiyasının genişmiqyaslı ixtisar kampaniyası çərçivəsində bir çox yeni işçisi ilə yollarını ayırıb.

Bu prosesə Hökumətin Səmərəliliyi Departamentini (DOGE) idarə edən, lakin rəsmi olaraq onun rəhbəri olmayan Mask nəzarət edir. Daha əvvəl Argentina prezidenti Xavyer Mileidən aldığı zəncirli mişarla poza verən Mask, qurumundan asılı olmayaraq bir çox insanı işdən çıxaracağına söz verib.

Mask bu yaxınlarda Müdafiə Nazirliyində də olub. O, nazir Pit Heqsetlə görüşüb.

“The New York Times” xəbər verir ki, Maska Çinə qarşı gizli müharibə planları haqqında məlumat verilib. Lakin bu iddia Tramp və digər rəsmilər tərəfindən rədd edilib.

Mask hesabatı “saf təbliğat” adlandırıb və sızdıranlara qarşı hüquqi tədbir görülməsinə çağırıb.