Almaniya Prezidenti Frank-Valter Ştaynmayerin Azərbaycana səfəri və Prezident İlham Əliyevlə müzakirələrinə dair bir neçə tezis:

1. Almaniya Xəzər regionunu Avropanın enerji təhlükəsizlik və iqtisadi maraqları üçün artan əhəmiyyətini daha çox dərk edir. Almaniya regionda özünəməxsus məsuliyyət götürmək və Cənubi Qafqazla əlaqədar Avropa siyasətini formalaşdıran əlavə dəyər yaratmaq niyyətindədir.

Bu, Rusiya-Ukrayna müharibəsi fonunda Avropanın üzləşdiyi çağırışlara Berlinin verdiyi reaksiyadır və Almaniya regionda Azərbaycanla anlaşma olmadan problemlərin arta biləcəyindən ehtiyatlanır.

2. Almaniya Cənubi Qafqazda özünü inamlı geosiyasi aktor kimi tanıtmaqdan ötrü mümkündür ki, Bakı-Ankara strateji müttəfiqliyinə dəstək versin. Regionda Almaniya ilə qurulacaq yeni əməkdaşlıq potensialı Berlin-Bakı-Ankara normativləri üzərindən qiymətləndirilə bilər.

Lakin Almaniya bu istiqamətdə Fransanın ambisiyaları ilə üzləşə bilər. Hərçənd ki, istənilən halda Almaniyanın Azərbaycanla münasibətləri Fransa kartının neytrallaşdırılması baxımından qiymətli maneradır.

3. Almaniyanın Cənubi Qafqazda hərəkətdə olması Berlinin Azərbaycan-Ermənistan sülh gündəmindəki maraqlarını araşdırmağa zərurət yaradır. Almaniyada Ermənistana dəstək mexanizmləri qalsa da, o, sülh müqaviləsi ilə bağlı perspektivləri Azərbaycanın strateji maraqlarının irəlilədilməsi fonunda mərkəzi səhnədə görünmək istəyir. Ehtimalla, Almaniya da Azərbaycanın ATƏT-in Minsk Qrupunun ləğvi ilə bağlı qərarlarına dəstək göstərəcək. İkinci bir tərəfdən, Almaniya geoiqtisadi maraqlarını nəzərə alaraq Azərbaycanın Avropa Birliyinin Ermənistandakı missiyasının regiondan çıxarılması tələbinə qarşı çıxmayacaq. Bu, Avropa İttifaqının regionda təsirinin səmərəli və konstruktiv əsaslarla dərinləşməsi üçün Almaniyanın təqdim edəcəyi formul ola bilər.