Mərkəzi Avropa ölkəsi Sloveniyada müxalifətdə olan Sloveniya Demokratik Partiyasından (SDS) deputat olan Andrey Hoivik parlament binasının damına çıxaraq intihar edəcəyi ilə hədələyib.

Parlamentin damından izdiham qarşısında çıxış edən Hoivik baş nazir Robert Qolobu da daxil olmaqla heç kimi günahlandırmadığını deyib. “Bu ölkəyə etdikləri düzgün deyil”, – deyə Hoivik qışqırıb. Hoivik hadisə zamanı damda olan bir qadına qışqıraraq: “Bir addım da atsanız, özümü tullayacam” dediyi eşidilib.

***

Hadisə yerinə polis, yanğınsöndürən və təcili yardım qrupları cəlb olunub. Millət vəkili Hoivik yanğınsöndürənlər tərəfindən damdan endirilib. Polis hadisə zamanı xəsarət alan olmadığını bildirib. Hoivikin intihara cəhdinin səbəbi məlum olmasa da, Sloveniya mediası deputatın böhran keçirdiyini və son həftələrdə yorğunluq və emosional tükənmə əlamətləri göstərdiyini bildirib.

SDS lideri və keçmiş baş nazir Yanez Yanşa sosial şəbəkədə “Andrej Hoivik möhkəm dayan, tək deyilsən” paylaşımı edib. SDS parlament qrupu da açıqlamasında, “Bəzən həyatın bizə atdığı sınaqlar çox çətin ola bilər. Hər kəsdən anlayış gözləyirik”, – deyib.