Avropa Komissiyasının sədri Ursula von der Leyen bu gün bildirib ki, Avropa Rusiyaya qarşı 17-ci sanksiyalar paketini yenicə qəbul etsə də, daha sərt tədbirləri ehtiva edən 18-ci paket hazırlanır.

O, Ukrayna prezidenti Vladimir Zelenski ilə telefon danışığından sonra “X”də yazdığı paylaşımda, “Atəşkəsi təmin etmək üçün Rusiyaya təzyiqi artırmağın vaxtıdır”, – deyib.

***

Avropa Birliyi və Böyük Britaniya Ukraynada müharibəni davam etdirdiyi üçün Rusiyaya qarşı yeni sanksiyalar elan ediblər. Sanksiyalar Moskvanın enerji gəlirlərini və maliyyə şəbəkələrini hədəf alacaq.

Bu addım prezident Donald Trampın Vladimir Putinlə görüşündən atəşkəs vədini təmin edə bilməməsindən dərhal sonra atılıb.

Sanksiyalar Moskvanın enerji gəlirlərini nəql etmək üçün istifadə etdiyi gizli neft tankerləri və ona sanksiyalardan yayınmağa kömək edən maliyyə şəbəkələrini hədəf alır.

Almaniyanın xarici işlər naziri Yohann Vadeful bildirib ki, Rusiya ilkin şərt olmadan atəşkəsi qəbul etməyib və buna görə də cavab tədbiri görmək lazımdır.

“Amerikalı müttəfiqlərimizin bu məsələdə səssiz qalmamasını gözləyirik”, – Vadeful deyib.

***

Avropa liderlərinin çağırışlarına baxmayaraq, Vaşinqton hələ də oxşar addım atmayıb. Rusiya və Ukrayna son üç ildə ilk dəfə Trampın təşəbbüsü ilə birbaşa danışıqlara başlayıb.

Lakin Moskvanın irəli sürdüyü şərtlər Ukrayna tərəfindən rədd edilib. Kiyev administrasiyası Trampın təklif etdiyi qeyd-şərtsiz atəşkəsə hazır olduğunu açıqlasa da, Kreml danışıqlara başlamağı şərt qoyur.