“Everest adamı” kimi tanınan 55 yaşlı nepallı Kami Rita Şerpa Himalay dağlarında dünyanın ən hündür dağı olan Everestə 31-ci dəfə qalxaraq öz rekordunu yeniləyib. Nepalın dağlıq ərazilərində, xüsusən Himalay dağlarında yaşayan şerpa qəbiləsinin nümayəndəsi olan Rita Everesti ilk dəfə 30 ildən çox əvvəl fəth edib.

Zirvəni təşkil edən şirkət “Seven Summits Trekking” mövzu ilə bağlı verdiyi açıqlamada Kami Ritanın yalnız milli dırmaşma qəhrəmanı deyil, həm də Everestin özünün qlobal simvolu olduğunu bildirib.

***

Kami Rita ilk dəfə Everesti 1994-cü ildə fəth edib. Bu, kommersiya zirvəsi idi və Rita sonrakı illərdə demək olar ki, hər il Everestə qalxmaq istəyən müştərilər üçün bələdçi olaraq zirvəyə qalxır.

Keçən il 8849 metr hündürlüyü olan zirvəyə qalxdıqdan sonra Rita, “heç bir rekord qırmaq planları yoxdur, sadəcə işləyirəm”, – demişdi.

Şerpa 2024-cü ilin mayında AFP-yə, “Rekord üçün xoşbəxtəm, amma nəticədə rekordlar qırılır. Mən daha da xoşbəxtəm ki, zirvəyə qalxmaqlarım Nepalı dünyada tanıdıb”, – demişdi.

Qalxmanı təşkil edən şirkət verdiyi açıqlamada rekordun çərşənbə axşamı qırıldığını və Ritanın orada Hindistan ordusundan ibarət komandaya rəhbərlik etdiyini bildirib. Açıqlamada deyilir ki, Rita təkcə özü dırmaşmayıb, həm də digər üzvləri zirvəyə çatdırmaq üçün rəhbərlik və bələdçilik edib.