Dünyanın ən dəyərli çip istehsalçısı olan “Nvidia”, Çindəki yavaşlamanın balansına təsir etməsinə baxmayaraq, güclü gəlir proqnozunu paylaşdı.

“Nvidia”nın gəlirləri birinci rübdə təxminləri aşdı, eyni zamanda Çinə ixrac məhdudiyyətləri səbəbindən 8 milyard dollar itki proqnozlaşdırdı.

Kaliforniyada yerləşən çip istehsalçısı “Nvidia”, balansında 2026-cı maliyyə ilinin birinci rübü kimi qəbul etdiyi 27 apreldə sona çatan üç aylıq dövr üçün maliyyə nəticələrini açıqladı.

Şirkətin gəlirləri 69 faiz artaraq 44,1 milyard dollara çatıb ki, bu da təxmin edilən 43,3 milyard dolları üstələyib.

Rübdə xalis mənfəət illik 26 faiz artaraq 18,8 milyard dollara çatıb. Ötən maliyyə ilinin eyni dövründə şirkətin xalis mənfəəti 14,9 milyard dollar olub. Səhm başına xalis mənfəət bu dövrdə 60 sentdən 76 sentə yüksəlib.

Birinci rübdə səhm başına düzəliş edilmiş xalis gəlir 93 sentlik gözləntilərlə müqayisədə 96 sent oldu.

Şirkət həmçinin Çinə ixrac qaydalarına görə ikinci rübdə 8 milyard dollar gəlir itirəcəyini açıqlayıb. ABŞ administrasiyası aprelin 9-da şirkətə məlumat vermişdi ki, Çinə ixrac edəcəyi H20 çipləri üçün lisenziya tələb olunacaq.

“Nvidia”, maliyyə ilinin ikinci rübündə 45 milyard dollarlıq satış proqnozunu paylaşdı. Bu, “Bloomberg” analitiklərinin də gözləntiləri idi.

Baş direktor Yensen Huanq maliyyə nəticələri ilə bağlı verdiyi açıqlamada “Blackwell NVL72” süni intellektli superkompüterinin hazırda tam miqyaslı istehsalda olduğunu bildirib.

Huanq bildirib ki, “Nvidia”nın süni intellekt infrastrukturuna qlobal tələbat kifayət qədər güclüdür.

Ölkələrin süni zəkaya elektrik və internet kimi təməl bir infrastruktur kimi baxmağa başladığını deyən Huanq, “Nvidia”nın bu radikal çevrilmənin mərkəzində olduğunu söyləyib.