Rusiya Dövlət Dumasının Müdafiə Komitəsinin sədri Andrey Kartapolov Almaniyanı hücumla hədələyib.

Kartapolov iki gün əvvəl Rusiyanın “Life.ru” xəbər saytına deyib ki, Ukrayna Almaniya istehsalı olan “Taurus” raketlərindən istifadə edərsə, Berlin qanuni hədəf kimi qəbul ediləcək.

Almaniya kansleri Fridrix Merz həftənin əvvəlində bildirib ki, o, Ukraynada Rusiyaya qarşı Qərb istehsalı olan uzaqmənzilli raketlərdən istifadə etməkdə heç bir zərər görmür.

Lakin Berlin administrasiyası Ukraynanın çoxdan arzuladığı “Taurus” raketlərini hələ də göndərməyib. Merzin sələfi Olaf Şolz, müharibədə gərginliyin artmasının qarşısını almaq üçün raketlərin tədarükünü dəfələrlə əngəlləmişdi.

Yeni kanslerin bu açıqlaması ilə “Taurus” raketlərinin tədarükü ilə bağlı siyasət dəyişikliyinin olub-olmayacağı maraq mövzusuna çevrilib. Merz apreldə demişdi ki, “Taurus” raketləri Rusiyanın ilhaq etdiyi Krımda əsas körpünü vurmaq üçün də istifadə edilə bilər.

“Taurus” raketləri təqribən 500 kilometr mənzilə malikdir. Onlar Ukraynanın istifadə etdiyi Amerika istehsalı olan ATACMS və Britaniya-Fransa istehsalı olan “Kölgə Fırtınası” raketlərindən daha uzağa buraxıla bilər. Ukraynanın “Taurus”larla birbaşa Moskvanı vurması mümkündür.

Digər tərəfdən, Kartapolov, Ukrayna əsgərlərinin raketlərdən istifadə etmək üçün alman hərbçiləri tərəfindən öyrədilməsi lazım olduğuna diqqət çəkərək, bunun Berlin rəhbərliyinin müharibəyə qoşulması anlamına gələcəyini bildirib.

Kartapolov, Ukraynanın ABŞ və Avropanın verdiyi məlumatlarla Rusiya hədəflərini müəyyənləşdirdiyini və vurduğunu, “Taurus”lardan istifadə ediləcəyi təqdirdə alman əsgərlərinin də Ukraynaya yerləşdiriləcəyini bildirib.

Almaniyanın bu cür raketləri verəcəyi təqdirdə Moskvanın “hər şeyə hazır olduğunu” bildirən Kartapolov, “Biz “Taurus” raketlərini dayandırmağa, onların buraxılış məntəqələrini, operatorlarını və lazım gələrsə, bu silahların alındığı yerləri vurmağa hazırıq”, – deyib.

İki gün əvvəl Berlin administrasiyası Ukrayna ilə uzun mənzilli raketlərin inkişafı proqramı üzərində işlədiyini açıqlayıb. Almaniya Müdafiə Nazirliyi də həmin gün Ukraynaya 5 milyard avroluq yardım paketinin göndəriləcəyini bildirib.

Rusiyanın xarici işlər naziri Sergey Lavrov Merz administrasiyasının mövqeyini tənqid edərək, “Almaniyanın müharibədə birbaşa iştirak etdiyi indi aydın oldu”, – deyib.