Yeni hesabatda Avropa Birliyinin (AB) verdiyi yüz milyonlarla dollar vəsaitin imkansız icmaların hüquqlarını pozan layihələr üçün istifadə edildiyi iddia edilir.

Avropada 8 vətəndaş cəmiyyəti təşkilatının tərtib etdiyi məlumatlara əsaslanan hesabatda 6 ölkədə 63 layihə diqqət mərkəzində olub. Ümumilikdə AB-nin 1 milyard dollardan çox maliyyə dəstəyi alan bu təşəbbüslərin əsas hüquq və azadlıqlar baxımından iflasa uğradığı bildirilib.

“Bridge EU” tərəfindən imzalanan hesabatda çoxlu misallar verilib.

Rumıniyada qaraçılar üçün sosial evlərin bir şəhərin kənarında tikildiyi və əraziyə heç bir ictimai xidmət göstərilmədiyi bildirildi. Gəmi konteynerlərindən tikilən evlərin nə istilik və səs izolyasiyası olmadığı, nə də sağlamlığa yararlı sayıldığı vurğulanıb.

Yunanıstandakı qaçqınların qəbulu mərkəzlərinin yaşayış məntəqələrindən uzaq tutulduğu və həyat şəraitinin pis olduğu da bildirilib.

Bolqarıstan, Çexiya, Macarıstan, Polşa, Rumıniya və Yunanıstanda həyata keçirilən layihələrdə müəyyən edilən problemlərin təkcə bu ərazilərə aid olmadığı və oxşar halların Avropanın başqa yerlərində də baş vermə ehtimalının olduğu vurğulanıb.

Avropa Müstəqil Yaşamaq Şəbəkəsindən (ENIL) İnes Bulic hesabatı “aysberqin görünən hissəsi” kimi şərh edib.

O, Yunanıstanda xüsusi qayğıya ehtiyacı olan və əlilliyi olan şagirdlər üçün ayrıca məktəb tikildiyini, lakin onların məktəbə başqa şagirdlərlə birlikdə getməli olduqlarını söyləyib.

Bulic Rumıniyada əlillər üçün internat məktəbinə işarə edərək, “Bu çox narahatedicidir. Əlil və ya əlil olmayan bütün uşaqlar ailələri ilə birlikdə böyüməlidir”, – deyib.

Müxtəlif vətəndaş cəmiyyəti təşkilatlarının liderləri hesabatla bağlı məlumat verən “The Guardian”a bildiriblər ki, AB maliyyələşdirməni izləməkdə daha diqqətli olmalıdır.