Ağ Evə Ukraynanın 40-a yaxın Rusiya hərbi bombardmançısını məhv edən “genişmiqyaslı” pilotsuz uçuş aparatı (PUA) zərbəsi barədə əvvəlcədən məlumat verilməyib.

Ukraynanın təhlükəsizlik mənbələri “CBS News”a bildiriblər ki, dünən Rusiya təyyarələrinin böyük bir donanmasını məhv edən Ukraynanın pilotsuz təyyarələri ilə endirdiyi zərbələr barədə Donald Trampa əvvəlcədən məlumat verilməyib.

Mənbələrin bildirdiyinə görə, Ukrayna Rusiya ərazisinin dərinliklərində “geniş miqyaslı” PUA-ların hücumu zamanı beş bazanı hədəfə alıb və 40 hərbi bombardmançı təyyarəni məhv edib.

Mənbələr əlavə edib ki, hücumun planlaşdırılması il yarımdan çox vaxt aparıb və şəxsən Ukrayna prezidenti Vladimir Zelenski tərəfindən idarə olunub.

Ukrayna və ABŞ rəsmiləri “Axios”a bildiriblər ki, Ukrayna rəsmiləri Tramp administrasiyasını hücumla bağlı əvvəlcədən xəbərdar etməyiblər.

Hücum bu gün Zelenskinin müdafiə naziri Rustəm Ömərovun başçılıq etdiyi nümayəndə heyətini Rusiya ilə atəşkəs danışıqları aparmaq üçün İstanbula göndərəcəyini elan etməsindən sonra baş verib.

Ukrayna rəsmisi “Axios”a bildirib ki, əməliyyat ölkənin təhlükəsizlik xidmətləri tərəfindən həyata keçirilib və zabitlər Rusiya aviabazalarının yaxınlığında gizli saxlanılan yük maşınlarından pilotsuz təyyarələr buraxıblar. Məlumata görə, yük maşınlarının bəziləri Ukraynadan minlərlə mil uzaqda, Sibirdə park edilib.

Zərbə zamanı 40-a yaxın Rusiya hərbi təyyarəsinin, o cümlədən strateji bombardmançıların vurulduğu bildirilir. Tramp ikinci səlahiyyət müddətinin ilk aylarında Rusiya və Ukrayna arasında üç ildir davam edən müharibəyə son qoymağa çalışırdı.

Rusiya prezidenti Vladimir Putinin çoxdankı müttəfiqi olan Tramp bu yaxınlarda Rusiya liderindən məyus olduğunu ifadə edərək, “Truth Social”da Putinin “tamamilə dəli olduğunu və Ukraynada lazımsız yerə çoxlu insanı öldürdüyünü”, – yazmışdı.

Ukraynanın Rusiyaya misli görünməmiş dron hücumu Rusiyanın müxtəlif bölgələrində körpünün uçması nəticəsində 7 nəfərin ölümü və 69 nəfərin yaralanması ilə nəticələnib.

Rusiya Dəmir Yolları Ukrayna sərhədindəki Bryansk vilayətində baş verən qəzanı “nəqliyyat fəaliyyətinə qeyri-qanuni müdaxilə” ilə əlaqələndirib, ehtimal ki, ukraynalı təxribatçıları nəzərdə tuturdu, lakin sonradan həmin “Telegram” postu silinib.