Kiyevin Rusiya döyüş təyyarələrini hədəf alan “Hörümçək toru” əməliyyatından sonra Moskva genişmiqyaslı cavab tədbirləri görüb. Bununla belə, Kreml tərəfdarları daha sərt, hətta nüvə reaksiyası istəyirlər. Kiyevdə insanlar “əsl qisas gözlənilir” deyə qorxuya düşüblər.

Ukraynanın hava bazalarına qəfil hücumundan bir neçə gün sonra Rusiya ölkənin paytaxtına və digər bölgələrinə misli görünməmiş pilotsuz təyyarə və raket hücumu həyata keçirdi.

Ukrayna hakimiyyəti qanadlı raketlərin və yüzlərlə pilotsuz uçuş aparatının (PUA) buraxılması nəticəsində 5 nəfərin öldüyünü, 80 nəfərin yaralandığını açıqlayıb.

Hücumlar paytaxt Kiyev və şimaldakı Çerniqov şəhəri, həmçinin şimal-qərbdəki Lutsk və Ternopil şəhərlərini hədəf alıb.

***

Ukrayna prezidenti Vladimir Zelenski Rusiyanın bir gecədə 400-dən çox PUA və 40 raketdən istifadə etdiyini və bunun müharibənin ən böyük bombardmanlarından biri olduğunu söyləyib.

Məlumata görə, Moskvanın zərbəsi 80 nəfəri yaralayıb və qərbdə Lvovdan şimal-şərqdə Sumiyə qədər doqquz rayonu əhatə etməklə, bütöv Ukrayna hədəf alıb.

Rusiya hücumların Kiyev rejiminin terror aksiyalarına cavab olduğunu və hərbi obyektləri hədəfə aldığını bildirib.

***

Rusiya üç il davam edən genişmiqyaslı müharibə zamanı demək olar ki, hər gün Ukraynanı hədəfə alır.

Lakin ukraynalılar Rusiyanın strateji aviasiya donanmasının üçdə birindən çoxunu hədəf alan əməliyyatdan sonra Kremlin mümkün cavab tədbirlərinə hazırlaşırdılar.

Hücum Rusiya prezidenti Vladimir Putinin Ukraynanın Rusiyaya qarşı son hücumlarına cavab verəcəyi barədə xəbərdarlıq etməsindən sonra baş verib.

ABŞ prezidenti Donald Tramp cümə günü axşam jurnalistlərə deyib ki, “Ukraynalılar Putinə səbəb verdilər ki, dünən gecə onları bombalasınlar”.

***

Hücumun Rusiyanın vəd etdiyi qisas olub, yoxsa Putinin gərginliyi daha da artırmağı planlaşdırdığı hələ məlum deyil. Lakin Kiyevin əməliyyatının Kremlə gətirdiyi biabırçılıqdan sonra kremlpərəst ekspertlər dəfələrlə sərt, hətta nüvə silahı ilə bağlı cavab verməyə çağırıblar.

Ukraynalılar Kiyevin uğurlu əməliyyatı xəbərindən ruhlansa da, çoxları Rusiyanın buna necə cavab verəcəyindən narahatdır.

Hücumlardan sonra bir ukraynalı qadın “CNN International”a danışıb. Olqa bildirib ki, Rusiyadan bu qondarma “qisas” müharibənin digər gecələrindən heç də fərqlənmir. Kiyevdə yaşayan gənc qadın “Bəlkə bu qisas idi, amma bəlkə də əsl qisas hələ gəlməyib. Hər iki halda bu, bizim nə düşmənə, nə də ölkəmizə münasibətimizi dəyişməyəcək”, – deyib.

***

Ukrayna Baş Qərargahı gecə yarısı Hörümçək toru əməliyyatında zərər görməyən təyyarələrin əksəriyyətinin yerləşdiyi iki Rusiya hava bazasına hücum edildiyini açıqlayıb. Kremli hazır vəziyyətə gətirən əməliyyatda Rusiyanın Ukrayna şəhərlərinə raket hücumları təşkil etmək və mülki vətəndaşları öldürmək üçün istifadə etdiyi təyyarənin hədəf alındığı vurğulanıb.

Dünən Rusiyanın öz ərazisinə kütləvi hücumundan sonra Ukraynanın xarici işlər naziri Andrey Sibiqa deyib ki, Moskva növbəti dəfə “Ukraynada mülki əhaliyə hücum etməklə” məhv edilmiş təyyarələrinin qisasını alır.