ABŞ Maliyyə Nazirliyi may ayı üçün büdcə balansı hesabatını dərc edib. Hesabata görə, federal hökumətin büdcə kəsiri 1 oktyabr 2024-cü ildə başlayan və 30 sentyabr 2025-ci ildə sona çatacaq 2025-ci maliyyə ilinin səkkizinci ayında 316 milyard dollar olaraq hesablanıb.

Ötən ilin may ayında federal hökumətin büdcə kəsiri 347 milyard dollar olub. Belə ki, may ayında büdcə kəsiri ötən ilin eyni ayı ilə müqayisədə 9 faiz azalıb.

Bu dövrdə büdcə balansı üçün bazar gözləntiləri 314,3 milyard dollar kəsir idi.

May ayında hökumətin gəlirləri 15 faiz artaraq 371 milyard dollara, xərcləri isə 2 faiz artaraq 687 milyard dollara çatıb.

ABŞ prezidenti Donald Trampın tarif siyasətinə uyğun olaraq, may ayında gömrük rüsumu gəlirlərinin ötən ilin eyni dövrü ilə müqayisədə 270 faiz artaraq 23 milyard dollara çatması diqqət çəkib.

***

2025-ci maliyyə ilinin səkkizinci ayı olan may ayı etibarilə ölkənin cəmi büdcə kəsiri keçən ilin eyni dövrü ilə müqayisədə 14 faiz artaraq 1 trilyon 365 milyard dollara çatıb.

Bu kəsir ötən ilin eyni dövründə 1 trilyon 202 milyard dollar olub.

Maliyyə ilinin ilk səkkiz ayında gəlirlər keçən ilin eyni dövrü ilə müqayisədə 6 faiz artaraq 3 trilyon 482 milyard dollara, xərclər isə 8 faiz artaraq 4 trilyon 846 milyard dollara çatıb.