Ukrayna prezidenti Vladimir Zelenski iyunun 20-də axşam etdiyi çıxışında Rusiya prezidenti Vladimir Putini ələ salaraq, Rusiya lideri üçün “ayətullah” titulundan istifadə edib.

Ərəb və fars dillərində “Allahın ayəsi” mənasını verən Ayətullah İranda dini hakimiyyət kimi də tanınır. İranın dini liderləri, o cümlədən Əli Xameneyinin adından əvvəl bu tituldan istifadə edirlər.

“Ruslar bu gün Ukraynaya qarşı müharibəni davam etdirmək istədiklərini açıq şəkildə göstərdilər. Bununla belə, Rusiya prezidenti Vladimir Putin İranın nümunəsinə nəzər salmaqla oxşar rejimləri hansı təhdidlərin gözlədiyini görə bilər”, – deyə Zelenski bildirib.

“Rusiya iqtisadiyyatı onsuz da pisləşir. Ayətullah Putin İrandakı dostlarından belə rejimlərin başına nə gəldiyini və ölkələrini necə geridə qoyduğunu görə bilər”.

Kremlin sözçüsü Dmitri Peskov, atəşkəs tələbləri ilə bağlı başqa bir açıqlamada Rusiyanın hazırda strateji üstünlüyə malik olduğunu və “onu əldən vermək niyyətində olmadığını” bildirib.

Peskov Rusiya ordusunun cəbhə xəttində irəliləyişini davam etdirəcəyi ilə də hədələyib.

“Daha altı yaşayış məntəqəsi ələ keçirilib”

Rusiya Müdafiə Nazirliyi dünən elan edib ki, Rusiya ordusu iyunun 14-dən 20-dək Ukraynanın Sumi, Xarkov və Donetsk vilayətlərində 6 yaşayış məntəqəsini nəzarətə götürüb.

Açıqlamaya görə, Rusiya ordusunun nəzarətə götürdüyü ərazilər – Novonikolayevka, Moskovka, Dolqonkoye, Zeleni Kut, Ulyanovka və Novonikolayevkadır.