Məlumata görə, ABŞ Nümayəndələr Palatasının administrasiyası Konqres əməkdaşlarına iş yeri ilə bağlı cihazlarda “WhatsApp” mesajlaşma proqramından istifadə etməyi qadağan edib.

“Axios” xəbər saytının əldə etdiyi daxili memoya görə, Nümayəndələr Palatası öz işçilərinə “WhatsApp” proqramı ilə bağlı xəbərdarlıq edib.

ABŞ Nümayəndələr Palatasının baş inzibati məmuru tərəfindən dərc edilmiş daxili memorandumda deyilir: “Nümayəndələr Palatasının əməkdaşları “WhatsApp” tətbiqini mobil telefon, masaüstü və ya veb brauzer versiyaları da daxil olmaqla, hər hansı iş yeri cihazına endirə və ya saxlaya bilməzlər". Qeyddə həmçinin cihazlarında “WhatsApp” tətbiqi olanlardan onu mümkün qədər tez silmələri xahiş edilib və "Kibertəhlükəsizlik İdarəsi “WhatsApp”ı istifadəçi məlumatlarını necə qoruduğuna dair şəffaflığın olmaması, saxlanılan məlumatların şifrlənməsinin olmaması və onun istifadəsi ilə bağlı potensial təhlükəsizlik riskləri səbəbindən istifadəçilər üçün yüksək risk kimi qiymətləndirib”.

Bundan əlavə, işçilərə potensial şəxsiyyət oğurluğu fırıldaqlarına və naməlum nömrələrdən gələn mesajlara qarşı diqqətli olmaları barədə xəbərdarlıq edilib, “Microsoft Teams”, “Wickr”, “Signal”, “iMessage” və “FaceTime” isə “WhatsApp” tətbiqinə alternativ olaraq göstərilib.

ABŞ Nümayəndələr Palatasının administrasiyası işçilərin məlumatlarını qorumaq üçün son illərdə “DeepSeek”, rəqəmsal və süni intellekt sahəsində “ByteDance” proqramlarına və “Microsoft Copilot”a qismən qadağalar qoyub.

Konqres işçilərinin “ChatGPT”dən istifadəsi ciddi şəkildə məhdudlaşdırılıb və ofislərə yalnız ödənişli versiya olan “ChatGPT Plus”dan istifadə etmək barədə göstəriş verilib.