İsveç hökuməti 2026-cı ildən etibarən ibtidai və orta məktəblərdə ağıllı telefonların istifadəsini qadağan edəcək. Qərarın dərs fasilələrində də tətbiq olunacağı bildirilib.

İsveç Təhsil Naziri Simona Mohamsson, İsveçin rəsmi radiosu SR-yə verdiyi açıqlamada, ölkə üzrə bütün ibtidai, orta və lisey məktəblərində 2026-cı ildən etibarən ağıllı telefonların istifadəsinin qadağan olunacağını bildirib.

Mohamsson, hökumətin təklifin həyata keçirilməsi üçün 10 milyon dollar büdcə ayırdığını diqqətə çatdırıb və “Şagirdlər TikTok-da vaxt itirmək əvəzinə dərs fasilələrində dostları ilə vaxt keçirməyi və futbol oynamağı öyrənməlidirlər” deyib.

Almaniya, İngiltərə və Fransa da məktəblərdə ağıllı telefon qadağası tətbiq edən digər ölkələr arasındadır.