İspaniyada elektrik şəbəkəsinin dağılmasından həftələr sonra bu gün səhər saatlarında bütün ölkə boyu telefon şəbəkəsi çöküb. Heç kimə zəng edə bilməyən ölkə vətəndaşları təlaşa düşüb. Hətta təcili yardım xidmətləri də işləyə bilməyib.

İspaniyanın Telefónica mobil şəbəkəsi tərəfindən infrastrukturun yenilənməsindən sonra baş verən kəsinti xüsusilə stasionar telefon xidmətlərinə təsir edib.

Araqon, Ekstremadura, Bask ölkəsi və Valensiya kimi bölgələrdə 112 təcili yardım nömrəsinə müraciət etmək mümkün olmayıb.

***

İspaniyanın Rəqəmsal Transformasiya və Dövlət Xidmətləri Nazirliyi, şəbəkə qəzasından sonra həll müddəti və texniki vəziyyətlə bağlı şirkətdən ətraflı məlumat tələb etdiyini açıqladı. “Downdetector”un məlumatına görə, fasilələr yerli vaxtla axşam saat 2 radələrində başlayıb. “El Pais” qəzeti yazır ki, şikayətlər sürətlə bütün ölkəyə yayılıb və xüsusilə kənd yerlərində rabitə tamamilə kəsilib.

“Biz bəzi şirkətlərdə müəyyən xidmətlərə təsir edən şəbəkə yeniləmələrini həyata keçirmişik. Problemi həll etməyə çalışırıq”, – “Telefónica” sözçüsü bildirib.

Şirkət problemin aşkar edildiyi ərazilərlə məhdudlaşdığını bildirib. Bununla belə, ölkənin müxtəlif yerlərindən istifadəçi hesabatları kommunikasiya böhranının daha geniş yayıldığını göstərir.

***

Bu il aprel 28-də İspaniya və Portuqaliyaya təsir edən kütləvi elektrik kəsilməsi nəticəsində iflic vəziyyətinə düşən Pireney yarımadası ölkələrinə milyonlarla avro ziyan dəydi.

İspaniyanın elektrik şəbəkəsi operatoru “Red Electrica”, beş saniyə ərzində 15 gigavat hasilatı itirdiyini və bunun ölkənin enerji tələbatının 60 faizinə bərabər olduğunu deyib.

Elektrik kəsintisi xəstəxanalar, nəqliyyat sistemləri və kommunikasiya infrastrukturu da daxil olmaqla əsas xidmətləri iflic etmişdi. Səlahiyyətlilər hadisənin səbəbinin Qranadadakı günəş elektrik stansiyasında texniki nasazlıqlar olduğunu bildirmişdi.