ABŞ-da 2024-cü il prezident seçkilərinə doğru gedildikcə, sabiq prezident Donald Trampın afroamerikalı seçicilər arasındakı dəstəyi ciddi şəkildə azalmağa başlayıb.

“Decision Desk H.Q.” tərəfindən 7 iyul tarixinə qədər toplanan sorğuların ortalamasına görə, afroamerikalıların 71,5 faizi Trampın prezidentliyini təsdiqləmir. Onu dəstəkləyənlərin faizi isə cəmi 24,1-dir. Bu göstəricilər Trampın 2024 kampaniyasının əvvəlində qazanmağa başladığı qara dərili seçici dəstəyini böyük ölçüdə itirdiyini göstərir.

Məlumata görə, Tramp hələ prezidentliyinin ilk həftələrindən etibarən afroamerikalıların əksəriyyətinin dəstəyini qazana bilməmişdi. 2024-cü ilin iyununda isə Trampın ümumi seçici kütləsi arasında orta hesabla 63,7 faiz razılıq səviyyəsinə sahib olduğu qeyd olunurdu. Lakin son rəqəmlər narazılığın artdığını göstərir.

“Decision Desk”in məlumat analitikası direktoru Skott Tranter məsələ ilə bağlı “The Hill” qəzetinə açıqlamasında, “Ümumi təsdiq reytinqində azalma var. Bunun bir səbəbi olmalıdır. Afroamerikalı seçici dəstəyi Trampın ən yeni qazandığı dəstək idi və çox güman ki, ilk itirdiyi də o olacaq”, – deyib.

2020-dən fərqli dinamika

2020 seçkilərində afroamerikalı seçicilərin cəmi 8 faizinin səsini qazanan Tramp, 2024 kampaniyasında bu dəstəyi 15 faizə qədər artırmışdı. Hətta ispan mənşəli seçicilər arasında Kamala Harris ilə bərabər səviyyədə dəstək almışdı. Lakin son sorğular bu dinamikanın artıq dəyişdiyini göstərir.

Dəstəyin azalmasının mümkün səbəbləri

Mütəxəssislər Trampın afroamerikalı seçicilər arasındakı nüfuzunun azalmasının bir neçə səbəbi olduğunu düşünür. Bunlara iqtisadi qeyri-müəyyənliklər, sosial proqramlara yönəlmiş dəyişikliklər və azlıqlar üçün simvolik əhəmiyyət daşıyan qərarların ləğvi daxildir.

Trampın imzaladığı “Böyük Gözəl Qanun Paketi” çərçivəsində varlılara tətbiq edilən vergilər azaldılıb. Bu da dövlətin aşağı gəlirli insanlar üçün nəzərdə tutduğu “Medicaid” səhiyyə proqramından milyonlarla insanın çıxarılması riskini artırır. Qeyd edək ki, “Medicaid” proqramından afroamerikalılar geniş şəkildə istifadə edir.

Digər tərəfdən Tramp administrasiyası federal qurumlarda müxtəliflik və inklüzivlik proqramlarını dayandırmaq, ABŞ Hərbi Dəniz Akademiyasında müsbət ayrıseçkiliyi ləğv etmək, dövlət arxivlərindən tanınmış afroamerikalı fiqurlar haqqında materialları çıxarmaq kimi addımlar atıb.

Bundan əlavə, vətəndaş müharibəsi dövründə köləliyi müdafiə etmiş Konfederasiya ordusunun komandanlarının adlarının bəzi hərbi bazalara verilməsi də afroamerikalı cəmiyyət tərəfindən mənfi qarşılanıb. Tramp bu addımı “ordu mənəviyyatı üçün vacib” kimi izah etmişdi.

***

Bütün bu faktorlar Trampın afroamerikalı seçicilər arasında itirdiyi dəstəyi izah etməyə kömək edir. Seçkilər yaxınlaşdıqca, bu qrupun səsləri prezidentlik yarışında həlledici rol oynaya bilər.