Ukrayna və İsrail arasında təhlükəsizlik və müdafiə sahələrində əməkdaşlığın genişləndirilməsi barədə razılıq əldə olunub. Ukraynanın paytaxtı Kiyevdə baş tutan görüşdə İsrailin xarici işlər naziri Gideon Saar və Ukraynanın xarici işlər naziri Andriy Sıbiha iştirak edib.

Vaxt.az-ın məlumatına görə, görüşdən sonra keçirilən birgə mətbuat konfransında tərəflər, İranın yaratdığı regional təhlükələrə qarşı birgə fəaliyyət göstərəcəklərini bəyan ediblər. Söhbət yalnız diplomatik addımlardan deyil, həm də “strateji təhlükəsizlik dialoqundan” və texnoloji müdafiə əməkdaşlığından gedir.

“İran təhdidinə qarşı ayrıca dialoq başlatdıq”

Ukrayna XİN rəhbəri Andriy Sıbiha görüşdən sonra verdiyi açıqlamada bildirib: “Moskva, Tehran və Pxenyan – bu rejimlər, bir-birini dəstəkləyən və bütün azad dünyanı təhdid edən cinayətkar ittifaqın tərkib hissələridir”.

Sıbiha əlavə edib ki, bu təhlükəyə cavab olaraq ikitərəfli və çoxtərəfli əməkdaşlığın aktivləşdirilməsi barədə razılıq əldə olunub. O, konkret olaraq İran təhdidinə qarşı ayrıca bir diplomatik və təhlükəsizlik kanalı açıldı deyə bildirib.

“İki ölkə üçün birlikdə hərəkət etməyin zamanıdır”

Nazir həmçinin vurğulayıb ki, Ukrayna ilə İsrailin müdafiə texnologiyaları sahəsində nəzərəçarpacaq potensialı mövcuddur. Bu imkanların birgə reallaşdırılması hər iki ölkənin təhlükəsizliyi və sabitliyi baxımından zəruridir: “Bu imkanları artıq reallığa çevirməyin vaxtıdır”.

İsrail: İran silahlarına qarşı fəaliyyət Avropaya da fayda verir

İsrailin xarici işlər naziri Gideon Saar isə öz növbəsində Ukraynaya tam dəstək verdiyini açıqlayıb. O, İranın silah sistemlərinə və texnologiyasına qarşı atılan addımların yalnız İsrail üçün deyil, Avropa və Ukrayna üçün də strateji əhəmiyyət daşıdığını bildirib.

“İran üzərində qurduğumuz strateji nəzarət və əks-tədbirlər həm də Avropa təhlükəsizliyinə xidmət edir”.

Tel-Əviv-Kiyev xətti Moskva-Tehran oxuna cavabdır?

Mütəxəssislər bildirirlər ki, bu əməkdaşlıq Rusiya, İran və Şimali Koreya arasında formalaşmaqda olan təhlükəli geosiyasi oxun əksinə, yeni bir “liberal təhlükəsizlik oxu”nun formalaşması cəhdi kimi də oxuna bilər.

İranın silah tədarükü, pilotsuz aparat texnologiyaları və qeyri-rəsmi paramilitar şəbəkələri artıq təkcə Yaxın Şərqdə deyil, Avropa savaşlarına da uzanır. Bu fonda İsrail və Ukraynanın bir araya gəlməsi təsadüfi deyil – bu, həm də Qərb ittifaqı içində alternativ hərbi və texnoloji koalisiyaların yaranmasına işarədir.