Hollandiya hökuməti mümkün müharibə, fəlakət və hücum hallarına qarşı hazırlıq planı çərçivəsində supermarketlər, qida şirkətləri, daşımacılıq firmaları və təhlükəsizlik bölgələri ilə görüşlərə başlayıb. Böhran anlarında yaşana biləcək mənfi halların qarşısını almağı hədəfləyən planda, uzunmüddətli ərzaq böhranı kimi ssenarilər ətraflı şəkildə nəzərdən keçirilib.

Vaxt.az xəbər verir ki, “Algemeen Dagblad” (AD) qəzetinin iyun ayı sonunda keçirilmiş bir iclasın sənədlərinə əsaslanaraq verdiyi məlumata görə, uzunmüddətli elektrik kəsintiləri, soyuducu sistemlərin sıradan çıxması, ərzaq böhranı və talan kimi mümkün hadisələr müzakirə olunub.

Hazırlıqlar geniş iştirakla həyata keçirilir. Bu işlərdə yalnız mərkəzi hökumət deyil, təhlükəsizlik bölgələri (veiligheidsregio’s), supermarketlər, ərzaq sənayesi və logistika sektoru nümayəndələri də iştirak edir. Görüşlərdə hansı ssenarilərin nə qədər real olduğu da müzakirə olunub.

Xəbərə görə, xüsusilə heyvan yemi təchizatının pozulması halında ət, süd və digər heyvani məhsulların çatışmazlığı yarana bilər. Belə bir vəziyyətdə fermerlərin daha çox taxıl, paxlalı və bitki yağı istehsal etməyə məcbur qalacağı ehtimal olunur.

Planın məqsədi, qaz və elektrik kimi əsas ehtiyaclara dair mövcud milli fövqəladə vəziyyət planlarına bənzər şəkildə, ərzaq təhlükəsizliyi üçün də ayrıca bir fəaliyyət planı hazırlamaqdır. Hazırda yalnız ərzağı əhatə edən belə bir plan mövcud deyil.

Mütəxəssislərə görə, ölkədə kifayət qədər ərzaq mövcuddur; əsas risk isə paylama zəncirində yarana biləcək fasilələrdir. AD qəzetinə danışan professor Laurens Sloot xəbərdarlıq edib: “Bir liman blokadaya alınsa və ya böyük bir paylama mərkəzi sıradan çıxa bilsə, çox sürətli şəkildə problemlər yarana bilər”. Sloot-a görə, paylama zəncirləri olduqca səmərəlidir, lakin bu səmərəlilik eyni zamanda həssaslıq yaradır.

Eyni zamanda, insanların kartla ödəniş edə bilmədiyi və ya bəzi bölgələrin tamamilə ərzaqsız qaldığı ssenarilər də nəzərdən keçirilir. Belə vəziyyətlərdə, hökumətin müvəqqəti olaraq ərzaq paylamasına nəzarəti ələ alması nəzərdə tutulur.

Milli böhran planının konkret nəticələrinin ortaya çıxması vaxt alacaq kimi görünür. Görüşmələr yaxın aylarda da davam edəcək. Bu proses, hökumətin cəmiyyətin dözümlülüyünü artırmağa yönəlmiş daha genişmiqyaslı planlarının bir hissəsidir.

Bu təşəbbüsün arxasında isə dərin geosiyasi dəyişikliklər dayanır. Müvəqqəti Hollandiya hökuməti, qısa müddət əvvəl parlamentə təqdim etdiyi məktubda, ölkənin genişmiqyaslı silahlı qarşıdurmaya birbaşa cəlb olunma ehtimalının “real” olduğunu vurğulamışdı.

Bu kontekstdə vətəndaşların evlərində fövqəladə vəziyyət çantası saxlamağa təşviq olunacağı bir kampaniya üzərində iş aparılır. Habelə enerji, logistika, nəqliyyat, telekommunikasiya, içməli su, elm müəssisələri və səhiyyə xidmətləri kimi kritik infrastrukturun xarici təsirlərə qarşı daha dayanıqlı hala gətirilməsi üçün planlar hazırlanır.