ABŞ birjalarında texnologiya səhmlərinin öncülük etdiyi ralli çərşənbə axşamı dayanıb. Federal Ehtiyat Sistemi (FED) sədri Cerom Pauell bankın oktyabr iclasında faiz endiriminə dair siqnal verməyib və iki tərəfli risklərə işarə edərək risksiz bir yol olmadığını vurğulayıb. Bunun fonunda “S&P 500” günü 0,55% azalma ilə bağlayıb. Bu, üç günlük yüksəlişin ardından ilk günlük eniş olub. “Nasdaq 100” 0,7% aşağı düşüb, texnologiya nəhənglərini əhatə edən “Möhtəşəm Yeddilik” indeksi isə 1,55% geriləyib.

Yeni ticarət günündə ABŞ-ın fyuçers indeksləri sabit qalsa da, Avropa fyuçersləri mənfi dinamika göstərib. “Wall Street” səhmlərinin geriləməsindən sonra Asiya birjaları da üç gün ərzində ilk dəfə azalma qeydə alıb.

“MSCI Asiya-Sakit okean” indeksi, dünən rəsmi tətil səbəbilə bağlı olan Yaponiya və Avstraliyada geriləmələrin təsiri ilə 0,2% aşağı düşüb. Super Tayfun “Ragasa”nın vurduğu Honq-Konqda bazarlar açıq qalıb və səhmlər bahalaşıb. “Alibaba Group Holding Ltd.” süni intellekt yatırımlarını artıracağını açıqladıqdan sonra 5,6% artıb. Honq-Konqun referans indeksində erkən ticarət zamanı əməliyyat həcmi son 30 sessiyanın ortalamasından təxminən 30% aşağı olub.

Trampın Rusiyaya qarşı ritorikasını sərtləşdirməsindən sonra Asiyadakı müdafiə sektoru səhmləri bahalaşıb, neft qiymətləri də artıb. “Brent” çərşənbə axşamı 1,6% bahalaşaraq bir barel üçün 68 dollara yüksəlib, ABŞ xam nefti isə 64 dollar ətrafında ticarət olunub.