ABŞ hökuməti İlon Maskın “SpaceX” şirkəti ilə 2,29 milyard dollarlıq yeni hərbi müqavilə imzalayıb. Müqavilə çərçivəsində şirkət ABŞ Kosmik Qüvvələri üçün xüsusi peyk rabitə şəbəkəsi quracaq.

VAXT.AZ “Reuters”ə istinadən xəbər verir ki, layihə qlobal hərbi kommunikasiya sisteminin modernləşdirilməsinə yönəlib. Yeni nəsil şəbəkənin dünyanın müxtəlif bölgələrində yerləşən hərbi sensorları, müşahidə sistemlərini və silah platformalarını real vaxt rejimində bir-biri ilə əlaqələndirməsi nəzərdə tutulur.

Pentaqonun məlumatına görə, sistem yüksək səviyyəli hərbi şifrələmə texnologiyaları ilə qorunacaq və mümkün kiberhücumlar, həmçinin elektron müharibə müdaxilələrinə qarşı dayanıqlı olacaq.

Analitiklər qeyd edirlər ki, bu müqavilə İlon Maskın rəhbərlik etdiyi “SpaceX”in təkcə kommersiya kosmik daşımalarında deyil, həm də hərbi və kəşfiyyat sektorunda təsirini sürətlə artırdığını göstərir. Şirkət son illərdə ABŞ ordusu üçün “Starshield” adlı xüsusi hərbi peyk şəbəkəsi üzərində də işləyir.

Ekspertlərin fikrincə, Vaşinqtonun bu addımı ABŞ ilə Çin və Rusiya arasında kosmos və hipersəs silahları sahəsində rəqabətin daha da sərtləşdiyini nümayiş etdirir.

Müqavilənin eyni zamanda “Lockheed Martin” və “Northrop Grumman” kimi ənənəvi müdafiə nəhənglərinin kosmik sifariş bazarındakı dominant mövqeyinə təzyiq yaratdığı bildirilir.