ABŞ prezidenti Donald Trampın Bəşər Əsədə qarşı münasibəti sərtləşib. Buna səbəb Əsədin son hücumların birində istifadə etdiyi kimyəvi silah səbəb olub. Politoloq Şahin Cəfərli maraqlı yanaşma nümayiş etdirib:

«Tramp İordaniya kralı ilə görüşdən sonra ABŞ-ın Suriya siyasətinin dəyişdiyini elan etdi.

Tramp bildirdi ki, kimyəvi hücum hadisəsindən sonra Əsədə münasibəti ciddi şəkildə dəyişib, Əsəd bir çox xətti keçib və bu vəziyyətlə barışmaq mümkün deyil. Hətta «Suriya böhranına artıq mən məsulam» ifadəsini işlətdi.

Senatorlar da Əsəd rejiminə qarşı tədbir görülməsini tələb edirlər. Respublikaçı Lindsey Graham bildirib ki, prezident Tramp elə bir addım atmalıdır ki, Obama onu heç vaxt ata bilməzdi: «Prezident Tramp hamıya sübut etməlidir ki, xarici siyasətdə və diktatorlarla mübarizədə Obama kimi hərəkət etməyəcək». (Trampı qızışdırır və qoltuğuna qarpız verir - Ş. C.) Senatorlar bir neçə gün əvvəl «Əsədin taleyini Suriya xalqı həll etməlidir», deyən dövlət katibi Tillersonu yıxıb-sürüyür.

Trampın bu gün özünün baş strateqi, antiqlobalist, islamofob, İŞİD-lə mübarizədə Əsədə əməkdaşlığı mümkün sayan Stiv Bannonu Milli Təhlükəsizlik Şurasından uzaqlaşdırması da maraqlı faktdır.

Trampın bəyanatının boş söz olub-olmadığını yaxın günlərdə görəcəyik...»