Fransa parlament seçkilərinin ikinci dövrəsində seçici fəallığı kəskin şəkildə aşağı düşüb, rəsmi rəqəmlər göstərir. Bazar günü günortayadək yalnız seçicilərin 17,75 faizi səs verib. 2012-ci il parlament seçkilərində bu rəqəm 21,41 faiz idi.

İkinci dövrə seçkiləri keçən bazar günü keçirilən birinci dövrədə ən çox səs toplayan namizədlər arasında keçirilir.

Prezident Emmanuel Makron vəd etdiyi islahatları icra etmək üçün parlamentdə güclü mandat qazanmaq istəyir.

Onun «La Republique en Marche» (Hərəkətdə olan Respublika) partiyası və müttəfiqi Demokratik Hərəkat (MoDem) partiyasının səslərin çoxunu toplayacağı gözlənilir.

Ənənəvi partiyalar hakimiyyətin prezidentin əlində inhisarlaşmaması üçün seçicilərə cənab Makronun rəqiblərinə səs verməyi tövsiyə edirlər.

Cənab Makronun partiyası yalnız bir il əvvəl yaradılıb. Partiya namizədlərinin bəzilərinin heç bir siyasi təcrübəsi yoxdur.

Partiyanın namizədləri arasında tələbələr, təqaüdçülər və hətta bir torero (öküzdöyüşdürən) da var.

Bir siyasi partiyanın parlamentə nəzarət edə bilməsi üçün 577 yerdən 289-u lazımdır.

Proqnozlara əsasən cənab Makronun partiyasının 400-dən artıq yer tutacağı gözlənilir.