Əfsanəvi braziliyalı futbolçu Pele Rusiya prezidenti Vladimir Putini Ukraynadakı müharibəni dayandırmağa çağırıb.

Dünya futbolunun əfsanəsi, 81 yaşlı braziliyalı Pele (Edson Arantis di Nasimentu) Rusiya prezidenti Vladimir Putini Ukraynaya qarşı müharibəni dayandırmağa çağırıb:

"Bu davam edən zorakılıq üçün qətiyyən heç bir əsas yoxdur. Bu münaqişə dəhşətlidir, əsassızdır və ağrıdan, qorxudan və nifrətdən başqa heç nə gətirmir”.

Pele Putinə özünün Instagram səhifəsindən müraciət edib: “Bunu dayandırmaq sizin əlinizdədir, 2017-ci ildə Moskvada son görüşümüz zamanı sıxdığım əllərdə”.

O vaxt Pele FIFA-nın müxtəlif tədbirlərində iştirak edirdi. Moskvaya isə 2018-ci ildə Rusiyada keçiriləcək Dünya Kuboku çempionatının ərəfəsində səfər etmişdi.

“Time”  jurnalına əsasən, Pele dünyanın 100 ən nüfuzlu adamı siyahısındadır.