Fransa hökuməti Ukraynaya Rusiyanın dondurulmuş aktivlərindən əldə edilən yardım paketini elan edib.

Fransanın “Le Tribune Dimanche” qəzetinə müsahibə verən müdafiə naziri Sebastien Lekornü Kiyevə 195 milyon avro yardım ediləcəyini və bu yardımın ölkənin müdafiəsini gücləndirmək üçün istifadə olunacağını bildirib.

Bu paketin Ukraynaya tank və zirehli texnika ilə yanaşı, 155 millimetrlik top mərmiləri və Fransa istehsalı olan AASM bombaları tədarük etməsinə imkan yaradacağını qeyd edən Lecornu, milli müdafiə xərclərinin də artacağını bildirib.

Nazir Lekornü həmçinin bildirib ki, Fransa müdafiə şirkəti “Dassault Aviation” 2026-cı ildən etibarən “Rafale” döyüş təyyarələrinin aylıq istehsalını 2-dən 4-5-ə çatdıracaq.

Lekornu prezident Emmanuel Makronun Rusiyanın Avropanın təhlükəsizliyinə əhəmiyyətli təhdid yaratdığı barədə sözlərini təkrarlayıb.

Böyük Britaniya və Ukrayna arasında Rusiyanın dondurulmuş aktivləri ilə dəstəklənən 2,2 milyard funt sterlinqlik kredit sazişi də imzalanıb.

***

Rusiya-Ukrayna müharibəsi başlayandan bəri Qərb ölkələri Rusiyanın təxminən 300 milyard dollarlıq aktivlərini dondurub. Bu məbləğin təxminən 200 milyard dolları Avropa Birliyi ölkələrinin payına düşür.

Dondurulmuş aktivlər hər il milyardlarla dollar faiz gəliri gətirir. G7 ölkələri, xüsusən də ABŞ bu gəliri Ukraynaya dəstək vermək üçün istifadə etmək istəyir.